Irani dhe vendet europiane bien dakord për rifillimin e bisedimeve bërthamore
Irani ka rënë dakord të takohet me tre nga vendet më të fuqishme europiane, Gjermaninë, Francën dhe Mbretërinë e Bashkuar, për të zhvilluar bisedime të reja mbi programin e tij bërthamor. Ministri i Jashtëm iranian, Abbas Araqchi, deklaroi:
“Po punojmë për të caktuar një datë për takimin me europianët.”
Ai theksoi gjithashtu se qasja e Teheranit në këto bisedime është “më e fortë se më parë”.
Mediat raportojnë se është arritur një marrëveshje për formatin e negociatave, të cilat pritet të zhvillohen në nivelin e zëvendësministrave të Jashtëm.
Ukraina propozon raund të ri bisedimesh me Rusinë
Kievi ka propozuar një raund të ri bisedimesh paqeje me Rusinë që të mbahet javën e ardhshme, njoftoi të shtunën Presidenti i Ukrainës, Volodymyr Zelensky.
Në një mesazh video të publikuar në platformën X, Zelensky theksoi se “ritmi i negociatave duhet të shtohet” për të garantuar një paqe të qëndrueshme.
“Nevojitet një takim mes udhëheqësve,” shtoi ai, duke konfirmuar gatishmërinë e Ukrainës për një takim të këtij niveli.
Zelensky bëri të ditur se sekretari i sapoemëruar i Sigurisë Kombëtare dhe Mbrojtjes, Rustem Umerov, i ka dërguar ftesën Moskës.
Papa Leo XIV bën thirrje për armëpushim të menjëhershëm në Gaza
Papa Leo XIV përsëriti thirrjen për një armëpushim të menjëhershëm në Gaza, duke i bërë apel komunitetit ndërkombëtar të respektojë ligjin ndërkombëtar dhe detyrimet për mbrojtjen e civilëve.
“Përsëri bëj thirrje për një fund të menjëhershëm të kësaj lufte barbare dhe për një zgjidhje paqësore të konfliktit,” deklaroi ai.
Papa shprehu gjithashtu “dhimbjen e thellë” për sulmin izraelit ndaj të vetmes kishë katolike në Rripin e Gazës të enjten, ku humbën jetën tre persona dhe u plagosën dhjetë të tjerë, përfshirë edhe priftin famullitar.
Protesta kundër emigracionit në më shumë se 80 qytete në Poloni
Protesta kundër emigracionit, të organizuara nga partia e ekstremit të djathtë, u mbajtën në mbi 80 qytete të Polonisë, përfshirë Varshavën, Krakovin, Poznanin, Wroclawin dhe Bialistokun.
Protestuesit kërkuan mbylljen e kufijve me Lituaninë, Ukrainën, Bjellorusinë dhe Sllovakinë.
“Mjaft me politikën shumëvjeçare ‘le të hyjnë të gjithë, pastaj shohim kush janë’,” shkroi në X Krzysztof Bosak, një nga udhëheqësit e partisë së djathtë. "Gratë dhe burrat polakë kanë të drejtë të shqetësohen për nivelin e sigurisë në atdheun e tyre,” shtoi ai.
Bosak kërkoi dorëheqjen e qeverisë së Donald Tusk, mbylljen e kufijve për të ndalur emigracionin e paligjshëm dhe lejimin e forcave ushtarake që të qëllojnë ndaj atyre që hyjnë ilegalisht në territorin polak.
