Foto: Evangeline Lilly/ Getty Images

Aktorja e njohur për rolet e saj në serialin “Lost” dhe filmat “The Hobbit”, publikoi një video me ndjekësit në Instagram që e cilësoi “lajm i keq” .

Ajo ka publikuar disa përditësime që prej dëmtimit traumatik të trurit (TBI) që pësoi në muajin maj, kur humbi ndjenjat në plazh dhe goditi kokën në një gur.

Lilly tregoi se një skanim i fundit i trurit zbuloi se pothuajse çdo zonë e trurit të saj po funksionon me kapacitet të ulur.

“Pra, po, kam dëmtime në tru nga ky dëmtim traumatik dhe ndoshta edhe nga faktorë të tjerë,” tha ajo.

“Tani detyra ime është të kuptoj saktësisht çfarë po ndodh me mjekët dhe më pas të nis punën e vështirë për ta përmirësuar gjendjen, gjë që nuk e pres me shumë dëshirë, sepse ndihem sikur gjithë jetën time bëj vetëm punë të vështira."

Megjithatë, aktorja shprehet se si pasojë e këtij dëmtimi ajo mori kohën e saj për të pushuar gjatë pjesës së mbetur të vitit të shkuar.

"Por, kjo është në rregull. Rënia e aftësive të mia njohëse që ndodhi pasi godita fytyrën më ka ndihmuar të ngadalësoj ritmin dhe ta përfundoj vitin 2025 në një mënyrë më të qetë.”

Sipas Lilly-t, ishte ngushëllues fakti se rënia e aftësive njohëse nuk lidhet vetëm me perimenopauzën, por shqetësuese mbetet beteja e vështirë që e pret për të trajtuar këto dëmtime.

Shpjegim: Perimenopauza është periudha tranzitore që i paraprin menopauzës tek gratë. Gjatë kësaj kohe, nivelet e hormoneve riprodhuese, sidomos estrogjeni dhe progesteroni, fillojnë të bien, gjë që mund të shkaktojë ndryshime të ciklit menstrual dhe simptoma të ndryshme fizike dhe emocionale.

Në kohën e aksidentit, Lilly publikoi foto të fytyrës së saj të përgjakur pas lëndimit. Pasi përshkroi çfarë kaloi, u përpoq të shihte anën e mirë (aq sa mundej) ndaj gjithë situatës.

“Mund të duket çmenduri duke parë fytyrën time dhe dhëmbin e thyer, por ndihem shumë mirënjohëse që humba ndjenjat. Më duhej ta zhvendosja fokusin tim diku tjetër gjatë pjesës së mbetur të këtij viti.”