Will Smith i kërkoi falje Chris Rock, Akademisë së Filmit (që organizon Oscars) dhe shikuesve pasi gjuajti me shuplakë komedianin në skenë në ceremoninë e 94-të të çmimeve Oscar. Aktori u shpreh se e “kaloi cakun” dhe se veprimet e tij "nuk ishin tregues i njeriut që dua të jem".
Kur pranoi çmimin “Aktori më i mirë”, Will i kërkoi falje Akademisë, por nuk përmendi veçanërisht Chris Rock. Në një postim në rrjete sociale, Smith shkroi se “reagoi emocionalisht” ndaj shakasë së Chris Rock për gruan e tij, Jada Pinket Smith, e cila ka folur për humbjen e flokëve për shkak se ka alopecia.
“Dhuna në të gjitha format e saj është helmuese dhe shkatërruese,” tha Smith. “Sjellja ime në ndarjen e çmimeve Oscars ishte e papranueshme dhe e pafalshme. Shakatë janë pjesë e punës, por një shaka për gjendjen shëndetësore të Jada-s ishte e tepërt për mua dhe reagova emocionalisht. Do të doja të të kërkoja falje publike, Chris. E kalova cakun dhe gabova. Jam i turpëruar dhe veprimet e mia nuk ishin tregues i burrit që dua të jem. Nuk ka vend për dhunë në një botë me dashuri dhe mirësi.”
Aktori i kërkoi falje Akademisë së Filmit, producentëve të transmetimit televiziv, të pranishmëve, shikuesve dhe familjes Williams. Will Smith u vlerësua si “Aktori më i mirë” për rolin si Richard Williams, babai i Venus dhe Serena Williams.
“Më vjen thellësisht keq që sjellja ime ka njollosur atë që ka qenë një udhëtim i mrekullueshëm për të gjithë ne,” tha ai.
Chris Rock nuk ka folur publikisht për gjithë çfarë ndodhi. Departamenti i policisë së Los Anxhelosit tha të dielën se ishte në dijeni të incidentit, por nuk kishte nisur një hetim sepse Rock kishte refuzuar të padiste Will-in.
