E kuptoj deri-diku revoltën e çdo prindi, megjithëse nisur nga statistikat, le ta pranojmë që pyetja në vijim është me vend: Po sikur fëmija juaj të jetë përdhunuar?
Rasti i vajzës 13-vjeçare në Kavajë, që për disa muaj ishte përdhunuar sistematikisht nga 7 djem, ngre një sërë pyetjesh në lidhje me sigurinë në shkollë, seksualitetin te fëmijët, raporti me prindërit etj.
The Economist i dha zero pikë Shqipërisë në lidhje me mekanizmat mbrojtës kundër abuzimit seksual të fëmijëve. Thuhet gjithashtu nëpër studime se rreth 12% e fëmijëve shqiptarë janë viktima të ngacmimeve seksuale, ndërsa 5% e tyre janë viktima të abuzimit seksual. Të mos flasim pastaj për mentalitetin – pjesa më e madhe e këtyre rasteve nuk bëhen publike.
Rasti tronditës në Kavajë – që shkon deri në kufijtë e një historie të pabesueshme – ngre edhe njëherë alarmin e sigurisë në shkollë.
Sipas informacioneve të tanishme, ngjarja u zbulua rastësisht nga sanitarja e shkollës. E përsëris edhe njëherë – nga sanitarja! Po psikologu i shkollës ku ishte? Siç e thamë më sipër, përdhunimi ndodhte prej disa muajsh, që do të thotë se nuk do mend që e mitura ka shfaqur shenja të një fëmije të abuzuar seksualisht.
Sigurisht që në këtë pikë nuk dua kurrsesi të gjej një fajtor. Është e kuptueshme që një psikolog nuk mund të kontrollojë disa mijëra nxënës që ka një shkollë. Kësisoj lind nevoja urgjente që të shtohet numri i psikologëve nëpër shkolla. Ku i dihet, ndoshta përdhunimi mund të ishte zbuluar kohë më parë.
Kalojmë tani tek kurrikula. Nisur nga komentet e disa ndjekësve në Facebook, në pjesën dërrmuese të shkollave nuk përfshihet fare lënda e edukatës seksuale. Nuk duhet të harrojmë që fëmijët rreth moshës 12-13 vjeç duhet të kenë edukatë seksuale. Prindërit dhe shkolla duhet të sigurohen që të miturit të dinë kuptimin e disa gjërave, përpara se ta mësojnë në një mënyrë tjetër. Fëmija duhet të jetë i vetëdijshëm për trupin e tij.
Nga ana tjetër, e rëndësishme është edhe raporti prind-fëmijë. Sigurohuni që fëmijët të jenë të sigurt kur lundrojnë në internet. Pyetini vazhdimisht se me kë po flasin, ku po shkojnë dhe krijojini ambjent të përshtatshëm në mënyrë që të mos ju mbajnë sekrete.
7 djemtë në Kavajë, i bënin presion 13-vjeçares me një video të filmuar më parë. “Mënyra si adoleshentët janë të ekspozuar nga informacioni, dëshira për të eksploruar dhe eksperimentuar, bën të kemi raste të tilla me kërcënime,” tha me të drejtë për Top Channel presidentja e Urdhërit të Psikologut në Shqipëri.
Mos anashkaloni aktivitetet jashtëshkollore. Përfshihuni në jetën e tyre, në mënyrë që të ndihen të mbrojtur.
Në përfundim, nëse nuk shtohet numri i psikologëve nëpër shkolla, nëse fëmijët nuk marrin informacionin e duhur për seksualitetin dhe nuk kanë një raport të ngushtë me prindërit, na ngelet vetëm të kryqëzojmë gishtat që dikush tjetër të mos jetë viktima e radhës!
