Nëse jeni një prej atyre njerëzve që s’i tërheqin serialet amerikane, por zgjidhni ato turke, latine apo indiane, ndoshta kjo do t’ju tundojë.
Nuk duam të tregohemi diktues duke këmbëngulur të shikoni serialet anglosaksone, por e vërteta është se me skenarin, aktorët dhe buxhetin që kanë, ia vlen më shumë të humbasësh kohë me to sesa me Mariat dhe Zenepet. Është më shumë çështje ekonomie.
Është çështje ekonomie edhe për aktorët e telenovelave, që lanë shtëpitë e tyre në Mexico City për të marrë role në serialet amerikane, ku duken të tjetërsuar. I keni parasysh teknikat e aktrimit nëpër telenovela? “Oh, Antonio, të dua!”- dhe vështrimet shpuese që zgjasin rreth 10 sekonda?
Epo, aktorët e telenovelave po tregojnë më në fund talentin e fshehur në serialet amerikane, madje edhe look-un e kanë shumë më natyral, pa kaçurelat e ngrirë nga shkuma dhe grimin e rëndë.
Alfonso Herrera tek “Sense8”
Ai ka qenë një fenomen botëror kur u shfaq tek “Rebelde”, telenovela më e famshme e të gjitha kohërave për adoleshentë.
Por seriozisht, ku paska qenë ky djalë më parë? Qenka një super aktor! “Fox” i ka dhënë rolin e priftit Tomas Ortega në serialin horror “Ekzorcisti”, i cili mori kritika shumë të mira dhe u vendos të vazhdohej edhe me një sezon të dytë.
Gjithashtu, Herrera luan edhe rolin e një gej në serialin “Sense8”, dhe nëse do ta shikoni bëhuni gati për shumë, shumë puthje mes tij dhe aktorit spanjoll Miguel Angel Silvestre.
Eiza Gonzalez tek “From dusk till down”
Mund ta mbani mend si bjondia e “Amores Verdaderos”, por Eiza Gonzalez po kërkon ta lërë pas karrierën nëpër telenovela duke marrë disa role në produksionet amerikane.
Më së shumti, njihet për rolin e Satanico Pandemonium-it në serialin “From dust till down” në Netflix. Fillimisht një histori e famshme e librave komikë, krijuar nga Quentin Tarantino dhe Robert Kurtzman, “From dusk till doën” është ekranizuar disa herë si film dhe si serial, derisa në 2014-ën varianti i ri me regjinë e Robert Rodriguez-it u shfaq për herë të parë në Netflix.
Eiza Gonzalez luan edhe tek filmi “Baby Driver” me aktorë si Kevin Spacey, Jamie Foxx dhe Ansel Elgort.
Ana de la Reguera tek “Narcos”
Ana de la Reguera, e njohur gjerësisht në Shqipëri si Maria tek "Për ty", e ka lënë aktrimin në telenovela që shumë kohë më parë. Ajo është aktore e njohur në Hollywood, ku ka luajtur në filma si: “Nacho Libre” apo “Cop Out”.
Tani, ajo luan në një prej serialeve më të suksesshme të Netflix-it, “Narcos”, në rolin e Elisës. “Narcos” rrëfen historinë e Pablo Escobar-it dhe është kthyer gati-gati në një serial-kult për jetën e mafiozit më famëkeq në botë.
Aaron Diaz tek “Quantico”
Aktori i “Teresa” që u bë fiksimi i të gjitha gjimnazisteve në 2010-ën, luajti në një prej serialeve më të ndjekur të kanalit “ABC”.
“Quantico” është një thriller me terroristë me protagoniste aktoren Priyanka Chopra, që rrëfen historinë e një ish-agjenteje të FBI-së, e cila bëhet e dyshuara kryesore për një sulm terrorist. Këtu, Diaz luan rolin e Leon Velez, një gazetar në kërkim të historisë.
Nga ana tjetër, në Netflix mund të gjeni shumë telenovela spanjolle si edhe disa nga më të njohurat turke, mes tyre: “Sulejmani i Madhërishëm”, “Ezel”, “Kurti dhe Sura” etj.
Tashmë, “Netflix” po realizon edhe një serial tërësisht turk, me siguri një lëvizje për të fituar terren edhe në lindje, ku njerëzit janë mësuar me serialet televizive. Seriali do të ketë aktorë turkë, ndërsa historia do të jetë e bazuar në ngjarje historike të ndërthurura me fantazi.
Copyright Anabel.al / Ndalohet ribotimi pa lejen e redaksisë.
