Këngëtarja dhe aktivistja irlandeze Sinéad O'Connor ka ndërruar jetë në moshën 56-vjeçare.

Lajmin e bëri të ditur familja e saj duke thënë se “familja dhe miqtë e saj janë të shkatërruar”. Shkaku i vdekjes nuk është bërë publik.

Ajo njihej për këngën “Nothing Compares 2 U”, e publikuar në vitin 1990, e cila theu rekorde dhe i solli famë botërore.

Kryeministri irlandez Leo Varadkar tha se muzika e saj "u pëlqye në mbarë botën dhe talenti i saj ishte i pakrahasueshëm". Presidenti irlandez Michael D Higgins vlerësoi "autenticitetin" e O'Connor si dhe "zërin e saj të bukur dhe unik".

Sinéad O'Connor lindi në Glenageary, County Dublin, në dhjetor 1966 dhe pati një fëmijëri të vështirë. Kur ishte adoleshente, ajo u vendos në An Grianan Training Centre, në Dublin, e krijuar fillimisht për të burgosur vajza të reja që konsideroheshin të shthurura.

Një murgeshë i bleu një kitarë dhe e lidhi me një mësues muzike – nga ku nisi karriera e saj muzikore. Ajo publikoi albumin e parë të vlerësuar nga kritikët “The Lion And The Cobra” në vitin 1987, i cili u klasifikua në top 40 në Mbretërinë e Bashkuar dhe SHBA.

Albumi i dytë ishte “I Do Not Want What I Haven't Got”, ku përfshihej edhe “Nothing Compares 2 U”. E shkruar nga Prince, kënga arriti të kryesonte listat në mbarë botën, duke përfshirë SHBA dhe Mbretërinë e Bashkuar.

O'Connor, e cila fliste hapur hapur për pikëpamjet e saj sociale dhe politike, publikoi 10 albume midis viteve 1987 dhe 2014.

Në vitin 1991, ajo u shpall artistja e vitit nga revista Rolling Stone dhe mori çmimin Brit për artisten më të mirë solo ndërkombëtare.

Vitin e ardhshëm, një nga ngjarjet më të rëndësishme të karrierës së saj ndodhi kur ajo grisi një fotografi të Papa Gjon Palit II në “Saturday Night Live”, ku ishte e ftuar. Protesta e saj lidhej me abuzimin seksual të fëmijëve nga Kisha Katolike.

Pas kësaj, ajo u ndalua përgjithmonë që të merrte pjesë në NBC dhe në SHBA pati protesta kundër saj. "Nuk më vjen keq që e bëra. Ishte e shkëlqyer," tha ajo në një intervistë me New York Times në 2021.

Albumi i fundit i O'Connor, “I'm Not Bossy, I'm The Boss”, u publikua në vitin 2014.

Pasi u konvertua në fenë islame në vitin 2018, këngëtarja ndryshoi emrin e saj në Shuhada' Sadaqat, por vazhdoi të performojë me emrin e lindjes. Ajo publikoi një libër me kujtime, “Rememberings”, në vitin 2021.

Në janar 2022, djali i saj 17-vjeçar Shane u gjet i vdekur pasi u raportua i zhdukur dy ditë më parë.

Këngëtarja shkroi në rrjete sociale se ai "kishte vendosur t'i jepte fund luftës së tij tokësore" dhe kërkoi që "askush të mos e ndjekë shembullin e tij". Më pas, ajo anuloi të gjitha shfaqjet live për pjesën tjetër të vitit 2022 për shkak të "dhimbjes së vazhdueshme" pas vdekjes së djalit të saj.

Regjisorja Kathryn Ferguson, një nga njerëzit e fundit që foli me O'Connor para vdekjes së saj, tha se ishte "shkatërruar" nga lajmi. Ferguson punoi në një film dokumentar për O'Connor, të titulluar “Nothing Compares”, i cili do të dalë këtë të shtunë.

Në rrjete sociale, njerëzit vërshuan të postonin homazhe për këngëtaren. “Ishte aq e bukur si çdo vajzë përreth dhe kurrë nuk e përdori këtë si kartë,” tha këngëtarja Alison Moyet.

Komediani irlandez Dara O'Briain tha për vdekjen e saj: "Ky është një lajm shumë i trishtë. Shpresoj se ajo e kuptoi se sa shumë dashuri kishte për të."

Muzikanti Tim Burgess tha: "Sinead ishte mishërimi i vërtetë i një shpirti punk. Ajo nuk bëri kompromis dhe kjo e bëri jetën e saj më shumë një luftë. Shpresoj që ajo të ketë gjetur paqen."

Edhe pse ishte një figurë kontroverse, protestat e saj kishin gjithmonë një butësi. Kur ajo grisi foton e Papës në televizionin amerikan, ajo po mendonte për viktimat e abuzimit, jo për imazhin e saj. Albumet e saj të mëvonshme përfshinin himne për paqen dhe komunitetin. Në fillim të këtij viti, ajo fitoi një çmim për albumin klasik në Irlandë dhe ia kushtoi komunitetit të refugjatëve të vendit.

“Nothing Compares 2 U” ishte më e rëndësishmja: një këngë që e bëri atë të famshme kundër dëshirës së saj. Ajo ishte një këngëtare që donte të protestonte me një zë që kërkonte të dëgjohej. 

- Përshtatur nga BBC