Autorja britanike Sophie Kinsella, e njohur për serinë e romanëve bestseller "Shopaholic", është ndarë nga jeta në moshën 55-vjeçare. Ajo u diagnostikua me një formë agresive të kancerit në tru (glioblastoma) në vitin 2022.
Shkrimtarja, emri i vërtetë i së cilës ishte Madeleine Sophie Wickham, u kujtua nga kolegë e miq si një grua “e mrekullueshme dhe e ngrohtë”.
Familja e saj njoftoi se Sophie u nda nga jeta “e rrethuar nga dashuria, muzika dhe ngrohtësia”, duke thënë se ajo e përballoi sëmundjen me “kurajë të paimagjinueshme”.
Jojo Moyes, autorja e "Me Before You" dhe mike e saj prej 20 vitesh, tha se “nuk kishte takuar kurrë njeri me më shumë hir dhe mirësi”, duke e përshkruar Kinsella-n si tepër të talentuar, inteligjente dhe të thjeshtë, pavarësisht suksesit të madh.
Aktorja Isla Fisher, protagoniste e filmit "Confessions of a Shopaholic", u shpreh se ishte “absolutisht e thyer”, duke e quajtur Kinsella-n “heroinën” e saj.
Kinsella ka shitur mbi 50 milionë kopje librash në më shumë se 60 vende dhe është përkthyer në mbi 40 gjuhë. Ajo nisi të shkruante si fillim me emrin e saj të vërtetë, Madeleine Wickham, për ta ndryshuar më pas në Sophie Kinsella, duke u bërë e famshme ndërkombëtarisht me serinë e romanëve "Shopaholic", pas krijimit të personazhit ikonik Becky Bloomwood.
Përmes humorit, temave reale dhe protagonisteve të ndërtuara me kujdes, ajo u pa si një prej zërave më unikë të romancës komike moderne. Botuesi i saj e përshkroi si një autore me “shpirt të pashuar dhe një trashëgimi të paharrueshme”.
Në vitin 2024 ajo publikoi edhe një novelë mbi diagnozën e kancerit, duke pranuar se “gjithmonë e ka përpunuar jetën e saj përmes shkrimit”.
Kinsella la pas bashkëshortin dhe pesë fëmijët e tyre.
