Le ta pranojmë: pastrimi i shtëpisë është si një mini-maratonë dhe askush nuk ka qejf të vrapojë. Por me pak organizim dhe ca truke të vogla, kjo punë s’të merr gjithë ditën.
1. Planifikimi është gjysma e pastrimit
Para se të fillosh të fshish në mënyrë kaotike, mendo: cilat zona do pastrosh dhe në çfarë radhe? Bëj një listë të thjeshtë në telefon ose në letër.
2. Mbaji mjetet e pastrimit gati
S’ka asgjë më acaruese sesa të fillosh e pastaj të ngatërrohesh duke kërkuar detergjentin për xhamat. Mblidhi të gjitha produktet në një kosh ose kuti që ta marrësh me vete në çdo dhomë.
3. Pastrimi fillon nga lart-poshtë
Fillo nga raftet e sipërme, llambadari apo sipërfaqet që s’i prek njeri dhe lëre dyshemenë për në fund. Në këtë mënyrë nuk do pastrosh dy herë.
4. Pastro fillimisht “thatë”
Hiq pluhurin, fshij, përdor fshesën me korrent, pastaj fillo me pastrimin me lagështi. Pse? Sepse nëse përdor menjëherë produkte të lagështa, do krijosh më shumë rrëmujë sesa pastërti.
5. Kujdes me detajet e vogla
Dorezat e dyerve, telekomandat, çelësi i dritave etj., janë vende me shumë mikrobe dhe shpesh i harrojmë. Jepu një fshirje të shpejtë me një dezinfektues.
6. Dhomë më dhomë, pa panik
Mos iu fut pastrimit pa një plan konkret. Ndaji punët me seksione. Për shembull: sot dhoma e gjumit, nesër kuzhina. Truri s’do të dorëzohet nga mbingarkesa dhe ti s’do ndihesh si pastruese me orar të plotë.
7. Pastrimi s’duhet të jetë “ngjarje e madhe” çdo javë
Mos prit të vijë e shtuna që të përballesh me një mal me punë. Pastrimi i përditshëm i disa gjërave si lavamani ose soba, të kursen nga kaosi i të dielës.
