Në një kohë kur lidhjet shpesh lindin përmes aplikacioneve apo rrjeteve sociale, njohja mes aktorit Callum Turner dhe këngëtares me famë botërore Dua Lipa duket si e shkëputur nga një film romantik.
Në një intervistë të fundit për Sunday Times, Turner ka treguar se si janë njohur, cila ishte fjalia e parë që i tha Duas dhe si dashuria e përbashkët për librat u bë nisja e një historie të bukur.
Takimi i tyre i parë ndodhi në Los Angeles, gjatë një kafeje përpara festës së ditëlindjes së një miku të përbashkët. Të ulur pranë njëri-tjetrit, zbuluan krejt rastësisht se po lexonin të njëjtin libër: Trust, fitues i disa çmimeve, me autor Hernán Díaz.
“Sapo kisha mbaruar kapitullin e parë dhe ia thashë,” kujton Callum.
“Pastaj ajo më tha: ‘Edhe unë sapo e kam mbaruar kapitullin e parë.’”
Ai nuk e humbi rastin për ta bërë një koment me domethënie: “Pra, jemi në të njëjtën faqe.” Dhe ky ishte vetëm fillimi.
Njohja e tyre u kthye shpejt në diçka më shumë. Pamjet e para të çiftit bashkë u publikuan në janar 2024, kur ata u fotografuan pas premierës së serialit Masters of the Air, ku Turner luan rolin kryesor. Vetëm pak ditë më pas, u panë në momente romantike në një restorant në Los Angeles, duke konfirmuar atë që tashmë kishte nisur të përflitej.
Dalja e tyre e parë zyrtare si çift ndodhi në Met Gala 2025, ku fituan vëmendjen dhe simpatinë e të gjithëve.
Disa muaj më parë, është konfirmuar se çifti është tashmë i fejuar.
