Këngëtari dhe producenti Ray J ka hedhur një bombë të vërtetë në rrjetet sociale, duke pretenduar se po bashkëpunon me autoritetet federale për të ngritur një çështje RICO (i përdorur kryesisht për të ndjekur krimin e organizuar, kartelët e drogës, mashtrime financiare, ose aktivitete të lidhura me rrjete kriminale) ndaj ish-të dashurës së tij, Kim Kardashian dhe nënës së saj, Kris Jenner.
Gjatë një transmetimi live në X, ai tha se çështja që po përgatitet është “më e keqe se ajo e Diddy-t” dhe paralajmëroi se “agjentët federalë po vijnë”, duke theksuar se nuk mund të bënte asgjë për ta ndaluar këtë.
Ai nuk dha asnjë detaj tjetër rreth akuzave të pretenduara, duke lënë fansat dhe mediat në ankth, ndërsa përfaqësuesit e Kim, Kris dhe Ray J nuk kanë dhënë ende ndonjë koment zyrtar.
Ray J ka lidhje të njohura me familjen Kardashian përmes skandalit të famshëm të videove seksuale të vitit 2007, që ai e ka cilësuar si “momentin më të keq” në jetën e tij. Ai më pas akuzoi Kris Jenner për publikimin e videos, duke e quajtur atë veprim “më të shëmtuarin, më të paligjshmin dhe më të papranueshmin”, sidomos pas lindjes së vajzës së tij.
Për të, ky skandal ka pasur pasoja të thella personale dhe ai ka shprehur zemërim të madh ndaj mënyrës se si është trajtuar historia.
Burimi: Page Six
