Pas ngjarjes më të komentuar në Mbretërinë e Bashkuar, të cilës në internet po i referohen si Megxit, princ William foli për herë të parë në lidhje me situatën.
Shënim: Megxit është një bashkim i “Meghan” dhe “Exit” (dalje), që nënkupton largimin e Meghan Markle nga mbretëria. Termi është i ngjashëm me Brexit, që nënkupton largimin e Mbretërisë së Bashkuar nga Bashkimi Europian.
“Unë e kam mbështetur vëllain tim gjatë gjithë jetës, por nuk mund ta bëj [këtë herë]. Jam i trishtuar për këtë,” tha ai për Sunday Times.
Duka i Cambridge-it pranoi “trishtimin” e tij për vendimin e princit Harry dhe Meghan Markle për t’u larguar nga mbretëria.
“Gjithë çfarë mund të bëjmë dhe gjithë çfarë unë mund të bëj është që të përpiqemi t’i mbështesim dhe të shpresojmë që të vijë dita kur të jemi të gjithë në një mendje. Dua që të gjithë të jemi të bashkuar,” tha ai.
Përsa i përket situatës së metejshme, pritet që nesër (e hënë, 13 janar), mbretëresha Elizabeth II të organizojë një takim në Norfolk, Angli. Në mbledhjen e jashtëzakonshme mbretërore do të marrin pjesë të dy vëllezërit, princi Harry dhe William, i ati, princi Charles, Kate Middleton dhe Meghan Markle, e cila ndodhet në Kanada, por do të jetë e pranishme në takim përmes një video-telefonate.
“Ata, si të gjithë të tjerët, kanë shpresë se mund ta zgjidhin situatën, sa më shpejt të jetë e mundur. Është në interesin e të gjithëve,” tha një burim për The Guardian.
Burimi: The Guardian, Sunday Times, New York Post
