Ka diçka çuditërisht shumë tërheqëse që fshihet te serialet/historitë me krime të vërteta, mundësisht të pazgjidhura. Ti i dëgjon me ëndje para se të flesh, kur shëtit qenin apo lan pjatat dhe thjesht nuk ngopesh.
 
Popullariteti i serialeve që hedhin dritë mbi krimet e vërteta është kthyer në një nga trendet më të qëndrueshme të argëtimit në dekadën e fundit. Podkaste si “Crime Junkie”, “Morbid” dhe “My Favorite Murder”, dokumentarë si “Making a Murderer” dhe seriale si “American Murder: Gabby Petito” dhe “Monster” janë më shumë se thjesht argëtim—janë pjesë e mënyrës si ne e kuptojmë botën.
 
Prodhimet mbi krimet e vërteta janë zhvilluar nga një kuriozitet i ngushtë në një fiksim të përhapur. Popullariteti i tyre nuk lidhet vetëm me një kuriozitet —krimet e vërteta ofrojnë njohuri mbi frikën, kontrollin, rregullimin emocional dhe lidhjet njerëzore.

 
Pse gratë shohin më shumë seriale me krime?

Krimi i vërtetë, shpesh i përshkruar si njëkohësisht frikësues dhe ngushëllues, paraqet një paradoks që përputhet me përvojat tona të jetuara. Për gratë, të cilat statistikisht përballen me rrezik më të lartë për krime të dhunshme, serialet me krime të vërteta mund të shërbejnë si një formë ushtrimi psikologjik. Duke dëgjuar historitë e të tjerëve, ato mund të ndihen më në kontroll, më të përgatitura për të njohur shenjat paralajmëruese ose për të reaguar ndaj rrezikut.
 
Krimi i vërtetë ka gjithashtu një dimension të fortë shoqëror. Komunitetet që formohen rreth krimeve të vërteta ofrojnë hapësira për gratë që të ndajnë historitë e tyre, të ndihen të dëgjuara dhe të lidhen me njerëzit që i kuptojnë. Këto komunitete ofrojnë një platformë për të eksploruar cenueshmërinë, drejtësinë dhe identitetin, duke e shndërruar krimin e vërtetë nga një argëtim i thjeshtë në një mjet për përballje, lidhje dhe shërim kolektiv.

 
Përfitimet psikologjike nga krimet e vërteta
 
Krimet e vërteta plotësojnë disa nevoja njerëzore:
 
Kuptimi dhe zotërimi: Njerëzit janë krijesa që rrëfejnë dhe kanë dëshirë të krijojnë/ndjekin modele. Historitë me krime ofrojnë rebuse, të cilat të mbajnë të “karikuar” dhe duam që gjithnjë të dimë se si përfundon.
 
Siguria: Çuditërisht, të dëgjuarit/parë serialet me krime mund të bëjë që njerëzit të ndihen më të sigurt. Analizimi i asaj që përfundoi keq na bën të ndihemi më të informuar—dhe më të përgatitur.
 
Rregullimi emocional: Krimi i vërtetë sjell emocione të forta si frikë, zemërim dhe indinjatë në një mënyrë të strukturuar, duke na ndihmuar t'i menaxhojmë këto ndjenja në mënyrë produktive.
 
Pra, nëse të pëlqen të shohësh seriale të tillë, kupto që ka edhe të mira nga të cilat mund të përfitosh.