Ekzistojnë polemika gjithnjë e në rritje rreth një hetimi të Organizatës Botërore të Shëndetësisë për origjinën e pandemisë së Covid-19 pasi një nga anëtarët e saj tha se Kina kishte refuzuar të dorëzonte të dhënat kryesore.
Një delegacion ndërkombëtar udhëtoi në qytetin Wuhan muajin e kaluar, si pjesë e përpjekjeve për të kuptuar se si filloi shpërthimi i koronavirusit. Dominic Dwyer, një ekspert australian i sëmundjeve infektive i cili ishte pjesë e ekipit, tha se ata kishin kërkuar të dhëna të papërpunuara të pacientëve, por u ishte dhënë vetëm një përmbledhje.
Dwyer tha për Reuters të shtunën se shpërndarja e të dhënave të papërpunuara anonime është "praktikë standarde" për një hetim të shpërthimit. Ai tha se të dhënat e papërpunuara ishin veçanërisht të rëndësishme në përpjekjet për të kuptuar Covid-19.
Wuhan është vendi ku u identifikua sëmundja dhe qyteti i parë që u godit keq nga një valë infeksionesh, por Kina ka kërkuar të hedhë dyshime nëse pandemia e ka origjinën në Kinë, duke thënë se një burim mund të jetë ushqimi i ngrirë i importuar.
Ditë më parë, misioni i udhëhequr nga OBSH-ja në Kinë deklaroi se nuk po shqyrtonte më tej çështjen nëse virusi u përhap pas një incidenti në një laborator, por më pas, drejtori i përgjithshëm i OBSH-së, Dr. Tedros Adhanom Ghebreyesus tha:
“Disa pyetje janë ngritur nëse disa hipoteza janë hedhur poshtë. Duke folur me disa anëtarë të ekipit, dëshiroj të konfirmoj se të gjitha hipotezat mbeten të hapura dhe kërkojnë analiza dhe studime të mëtejshme.”
Burimet: Reuters, Guardian, OBSH
