Vendosja e një pllake përkujtimore në nder të poetit shqiptar Lasgush Poradeci në Vjenë, aty ku ai jetoi dhe u formua për gati një dekadë, ka shkaktuar reagime të forta nga njerëzit, pasi në këtë ceremoni nuk janë ftuar as vajzat e tij.
Një nga dy të bijat e poetit, Marie Gusho, ka reaguar publikisht përmes një postimi në Facebook, ku bën të ditur se informacionin për ceremoninë e ka marrë rastësisht nga Ambasadori i Shqipërisë në Austri, Fate Velaj, dhe jo përmes një ftese zyrtare.
Sipas postimit të saj, Marie Gusho thekson se nuk ka marrë asnjë ftesë dhe asnjë njoftim zyrtar nga Bashkia e Pogradecit, pavarësisht faktit që në ceremoni do të marrë pjesë kryetari i kësaj bashkie me një delegacion zyrtar.
Më tej, ajo zbulon edhe një bisedë private me ambasadorin Fate Velaj, ku e pyet:
“Përshëndetje, ky njoftim shërben si ftesë? Po shpenzimet kush i mbulon?”
Përgjigjja e ambasadorit, sipas saj, ka qenë e shkurtër:
“Është informacion. Nuk di gjë për shpenzime.”
Ceremonia për vendosjen e pllakës përkujtimore do të zhvillohet më 5 shkurt, në Graz, në banesën ku ka jetuar poeti Lasgush Poradeci. Në aktivitet do të marrin pjesë kryetarja e Bashkisë së Graz-it, kryetari i Bashkisë së Pogradecit me delegacion zyrtar, si dhe Ambasadori i Shqipërisë në Austri.
Ndërkohë, në komentet e postimit të Marie Gushos, njerëzit kanë kritikuar ashpër institucionet shqiptare, duke e cilësuar të papranueshme që trashëgimtaret e drejtpërdrejta të poetit të mos ftohen në një ngjarje kaq simbolike. Komenteve u është përgigjur po aq e indinjuar dhe Marie.
Lasgush Poradeci jetoi dhe studioi për rreth 10 vite (1924-1933) në Austri, kryesisht në Vjenë, ku u njoh me rrymat më të avancuara letrare dhe filozofike të kohës, ndikime që do të shfaqeshin më vonë fuqishëm në poezinë e tij lirike dhe filozofike. Pikërisht Vjena konsiderohet si vendi ku u formua intelektualisht poeti që do të linte gjurmë të pashlyeshme në kulturën shqiptare.
