Së fundmi, shumë medie kanë raportuar për nenin 108/b të Kodit Penal, duke e paraqitur si një dispozitë që dënon me burg ata që kryejnë marrëdhënie seksuale jashtë Shqipërisë. Por si qëndron puna realisht?
Së pari, është e rëndësishme të sqarohet që Kodi Penal aktual ekziston që nga viti 1995 dhe ka pësuar ndryshime të shumta gjatë viteve. Drafti i një Kodi të ri Penal i prezantuar në korrik të 2025-ës u tërhoq nga qeveria dhe nuk u miratua. Në janar të 2026-ës, vetëm tre ditë më parë, Kuvendi miratoi një paketë ndryshimesh dhe amendimesh në Kodin ekzistues, jo një ligj të ri të plotë.
Çfarë thotë realisht neni 108/b që po keqinterprtohet
Neni 108/b parashikon se:
“Organizimi i udhëtimeve për të tjerë, përkundrejt shpërblimit apo jo, me qëllim kryerjen e ndonjë prej veprave penale të parashikuara në këtë seksion ose në nenet 114, 114/a/1 dhe 117, pavarësisht parashikimeve ligjore përkatëse në vendin për ku organizohet udhëtimi, dënohet me burgim nga dy deri në gjashtë vjet.”
Që do të thotë:
organizimi i udhëtimeve nga një person për një tjetër,
me ose pa përfitim financiar për organizatorin,
kur organizatori është në dijeni se udhëtimi bëhet me qëllim kryerjen e veprave penale seksuale të parashikuara në Kodin Penal (si shfrytëzimi për prostitucion, shfrytëzimi ose trafikimi seksual dhe abuzimi seksual);
pavarësisht ligjit të vendit ku ndodhin veprat,
Kodi Penal i Shqipërisë i dënon me burgim nga dy deri në gjashtë vjet për organizatorin.
Keqkuptimi me siguri vjen nga formulimi i gjerë i nenit duke krijuar përshtypjen se çdo marrëdhënie seksuale jashtë vendit mund të jetë e ndëshkueshme.
Por gjithsesi, mos u shqetësoni, neni 108/b nuk ju burgos juve dhe partnerin/en nëse kryeni marrëdhënie seksuale privatisht në udhëtimin e radhës. Ai ndalon organizatorët e aktiviteteve që shfrytëzojnë të tjerët për qëllime seksuale të paligjshme edhe jashtë Shqipërisë. Lajmet që po theksojnë të kundërtën po krijojnë një panik të panevojshëm.
