Një grua u gjet e vdekur në stomakun e një pitoni 7 metra në një plantacion ku ajo punonte në Indonezi, sipas raporteve lokale.
Gruaja, e identifikuar si Jahrah, 54 vjeçe, shkoi për të punuar në plantacionin e pemës së gomës (pemë nga trungu i të cilave nxirret lateks natyral) në provincën Jambi, në ishullin Sumatra, të dielën në mëngjes dhe burri i saj e raportoi të zhdukur kur ajo nuk u kthye në shtëpi atë mbrëmje.
Duke kërkuar të dielën mbrëma, bashkëshorti i saj gjeti sandalet, shaminë, xhaketën dhe mjetet që përdorte në punë dhe u bëri thirrje të tjerëve për të ndihmuar, tha policia për mediat lokale. Të nesërmen në mëngjes, një piton u vu re aty pranë.
“Kur ekipi i sigurisë dhe banorët kryen një kontroll rreth plantacionit, atëherë gjetëm një piton 7 metra të gjatë. Pasi e kapëm, gjetëm trupin e viktimës në stomakun e gjarprit," tha shefi i policisë lokale, AKP S Harefa, për faqen e lajmeve Detik (via Guardian).
Pitonët, të cilët vrasin përmes shtrëngimit, zakonisht hanë kafshë më të vogla, duke e gëlltitur plotësisht ushqimin e tyre. Rastet e gëlltitjes së njerëzve janë të rralla.
Çdo vit ka rreth 5.4 milionë raste të kafshimit të gjarpërinjve, nga të cilat 1.8-2.7 milionë çojnë në helmim, sipas Organizatës Botërore të Shëndetësisë. Fëmijët dhe punëtorët e bujqësisë në komunitetet më të varfra dhe rurale janë më të rrezikuarit.
