Sulmet me bombë në Kolumbi lënë të paktën 17 të vrarë
Një bombë e vënë në një automjet dhe një sulm ndaj një helikopteri të policisë në Kolumbi lanë të paktën 17 persona të vrarë të enjten, sipas autoriteteve. Presidenti kolumbian, Gustavo Petro, ia atribuoi të dy sulmet disidentëve të Forcave të Armatosura Revolucionare të Kolumbisë (FARC), një grup gueril i majtë që tashmë është shpërbërë.
Të paktën 12 oficerë policie humbën jetën në sulmin ndaj helikopterit, i cili sipas autoriteteve po transportonte personel drejt një zone në Antioquia, në veri të vendit, për të shkatërruar të mbjellat me gjethe koke, lëndë e parë për prodhimin e kokainës. Fillimisht Petro raportoi për tetë viktima, por guvernatori i Antioquias, Andrés Julián, tha se katër të tjerë humbën jetën më vonë dhe tre të tjerë janë të plagosur.
BE dhe SHBA njoftojnë marrëveshjen tregtare për tarifa deri në 15%
Brukseli dhe Uashingtoni publikuan të enjten deklaratën e përbashkët që vulos marrëveshjen tregtare të arritur pothuajse një muaj më parë, duke konfirmuar se automjetet, gjysmëpërçuesit dhe barnat do të përballen me tarifa maksimale prej 15% për të hyrë në SHBA.
Deklarata, ashtu si marrëveshja e arritur më 27 korrik në Skoci ndërmjet presidentes së Komisionit Europian, Ursula von der Leyen dhe presidentit amerikan, Donald Trump, është vetëm ‘de facto’. Ajo parashikon që ulja e tarifave për makinat do të vlejë në mënyrë të ndërsjellë, sapo BE të nisë procedurat për uljen e tarifave ndaj produkteve amerikane.
Erik Menendez i refuzohet kërkesa për lirim me kusht pas dekadash në burg
Erik Menendez-it iu refuzua kërkesa për lirim me kusht të enjten nga një trup gjykuese në Kaliforni, për shkak se sjellja e tij e keqe e vazhdueshme gjatë dekadave në burg për vrasjen e prindërve së bashku me vëllain e tij më të madh në vitin 1989, tregon se ai ende paraqet rrezik për sigurinë publike.
Menendez do të ketë të drejtë të bëjë kërkesë përsëri për lirim me kusht pas tre vitesh, vendosi një panel prej dy komisionerësh. Seanca për vëllain e tij, Lyle Menendez, i cili mbahet në të njëjtin burg në San Diego, është planifikuar për mëngjesin e së premtes.
Të dy vëllezërit u dënuan me burgim të përjetshëm në vitin 1996 për vrasjen me armë zjarri të babait të tyre, Jose Menendez, dhe nënës, Kitty Menendez, në vilën e tyre në Beverly Hills.
Rusia nis një nga sulmet më të mëdha ajrore të vitit ndaj Ukrainës
Rusia kreu një nga sulmet ajrore më të mëdha të vitit ndaj Ukrainës, duke lëshuar 574 dronë dhe 40 raketa balistike e lundruese gjatë natës së së enjtes, sipas Forcave Ajrore të Ukrainës.
Sulmi kishte në shënjestër kryesisht rajonet perëndimore të vendit, ku besohet se dërgohet dhe ruhet pjesa më e madhe e ndihmës ushtarake nga aleatët perëndimorë të Ukrainës.
Të paktën një person humbi jetën dhe 15 të tjerë u plagosën, sipas zyrtarëve.
Sipas të dhënave zyrtare, ky ishte sulmi i tretë më i madh ajror i Rusisë për këtë vit për nga numri i dronëve të përdorur dhe i teti për nga numri i raketave. Shumica e sulmeve të tilla kanë goditur zona civile.
