Foto: Hilary Duff/ Instagram

Hilary Duff ka një lajm të mirë për fansat. Ajo ka njoftuar se do të kthehet me një turne botëror pas thuajse dy dekadash. Këngëtarja e la të kuptohej këtë lajm gjatë turneut të vogël “Small Rooms, Big Nerves” që zhvilloi muajin e kaluar në Los Angeles. Tani ajo ka zbuluar datat e turneut “The Lucky Me”, i cili do të përfshijë shtatë shtete dhe do të nisë më 22 qershor.

Pjesë e turneut pritet të jenë edhe të ftuar specialë. Ajo do të udhëtojë drejt Anglisë dhe Australisë, për t'u rikthyer më vonë me koncerte në Kanada dhe Meksikë. Turneu pritet të përfundojë në shkurt të vitit 2027.

Teksa informacionet paraprake mbi shitjen e biletave janë publikuar, Hilary Duff po përgatitet për publikimin e albumit të saj të gjashtë, “Luck… Or Something”, më 20 shkurt. Shtatorin e kaluar, ajo njoftoi se kishte firmosur një kontratë me shtëpinë diskografike "Atlantic Records" dhe se po realizon gjithashtu një dokumentar me disa episode ku flet për rikthimin e saj në muzikë, data e publikimit të së cilit ende nuk është bërë e ditur.

Emri i saj ka qenë në qendër të vëmendjes mediatike për disa javë, pasi ish-mikesha e saj, Ashley Tisdale, kritikoi publikisht ish-grupin e saj të nënave në një ese për revistën The Cut. Në atë shkrim, Tisdale la të kuptohej se grupi ku bënin pjesë Hilary Duff, Mandy Moore dhe Meghan Trainor ishte “toksik”.

Pas deklaratave të saj, bashkëshorti i Hilary Duff, muzikanti Matthew Koma, reagoi me ironi në rrjetet sociale, duke publikuar një kopertinë të sajuar të The Cut me një titull tallës për Ashley-n, që shkruante:

“Kur je personi më egoist dhe më i shkëputur nga realiteti në botë, nënat e tjera priren ta zhvendosin vëmendjen te fëmijët e tyre”.

Në esenë e saj, Ashley Tisdale kishte shkruar se ndihej e përjashtuar nga takimet e grupit, gjë që e bëri të ndihej “jo mjaftueshëm cool” dhe e hutuar për arsyet pse po lihej jashtë. Ajo tha se u dërgoi mesazh duke u shprehur se kjo situatë i dukej “si sjellje adoleshentësh” dhe se nuk donte më të ishte pjesë e saj, duke theksuar se megjithatë nuk i konsideronte nënat “njerëz të këqinj”, me ndonjë përjashtim të mundshëm.

Megjithatë, Hilary Duff, ndryshe nga bashkëshorti, ka zgjedhur ta lërë pas krahëve dramën, duke iu rikthyer pasioneve të vjetra.