2 vjet e 6 muaj burg: Ky është dënimi për Urim Totën, babai i cili akuzohet për keqtrajtim të vajzës së tij të mitur.
Tota u dënua nga Gjykata e Tiranës pasi nxorri në rrugë për të lypur vajzën e tij shurdh-memece. Në dëshminë e dhënë prej tij, babai ka thënë se ishte detyruar ta nxirrte vajzën në rrugë për shkak të gjendjes së rëndë ekonomike dhe pamundësisë për të siguruar bukën për familjen e tij. Por ndërsa e mitura qëndronte për orë të tëra në rrugë në pritje të ndonjë lëmoshe nga kalimtarët, i pandehuri Tota nuk bënte vetë asnjë përpjekje për të siguruar punë, por thjesht priste muzgun për ta dërguar vajzën në shtëpi dhe për t’i numëruar lekët që kishte mbledhur, shkruan Top Channel. Ndonëse e dënoi me 2 vjet e 6 muaj burgim, për shkak të gjykimit të shkurtuar, dënimi përfundimtar për Totën reduktohet në 1 vit e 8 muaj burgim.
Rasti i Totës është vetëm një nga rastet e shumta të shfrytëzimit të fëmijëve nga njerëz zë afërt, apo edhe të panjohur. Çdo ditë, në kryeqytet dhe jo vetëm, shohim fëmijë që nxirren në rrugë për të lypur apo për të larë xhamat e makinave.
