Alpinisti amerikan Alex Honnold ngjiti të dielën rrokaqiellin Taipei 101, në Taipei, Tajvan pa asnjë litar apo pajisje mbrojtëse, duke realizuar një tjetër ngjitje ekstreme.
Brohoritjet shpërthyen nga turma e mbledhur poshtë ndërtesës, teksa Alex nisi ngjitjen e kullës 508 metra të lartë, duke përdorur trarët metalikë horizontalë për t’u ngjitur me duar. Vëmendje të veçantë mori momenti kur ai u ndal gjatë rrugës, u kthye nga publiku dhe i përshëndeti, i veshur me një bluzë të kuqe që binte në sy mes fasadës së ndërtesës.
Pas arritjes në majë, për të cilën iu deshën 1 orë e 31 minuta, Honnold e përshkroi përvojën si të jashtëzakonshme. “Pamja ishte e pabesueshme, një ditë vërtet e bukur,” tha ai. “Kishte shumë erë, ndaj vazhdimisht mendoja se do të bija. Po përpiqesha të ruaja ekuilibrin, por ishte një pozicion i jashtëzakonshëm dhe një mënyrë e veçantë për ta parë Taipein.”
Alpinisti tha se shpreson që ngjitja e tij të shërbejë si frymëzim për të tjerët.
“Mendoj se njerëzit shpesh gjejnë shtysën që u nevojitet për të ndjekur sfidat apo qëllimet e tyre. Ndonjëherë është pikërisht ajo shtysë që u duhet për të bërë atë që duan në jetë."
Prania e një turme të madhe ishte diçka e pazakontë për të. “Në fillim isha pak i tensionuar, sepse kishte shumë njerëz që po më shikonin,” tha ai. “Por pastaj e kupton që të gjithë po të urojnë më të mirën.”
Taipei 101 ka 101 kate, ndërsa pjesa më e vështirë e ngjitjes ishte segmenti i mesëm prej 64 katesh, i njohur si “kutitë e bambusë”, që i japin ndërtesës pamjen karakteristike. Këto janë të ndara në tetë seksione, secili me tetë kate, ku ngjitja është e pjerrët dhe me dalje, ndërsa ballkonet shërbyen si pika pushimi.
Honnold nuk është alpinisti i parë që ka ngjitur Taipei 101, por është i pari që e ka bërë pa litar. Alpinisti francez Alain Robert e ngjiti ndërtesën në vitin 2004, gjatë hapjes zyrtare të saj, por me pajisje sigurie.
Ngjitja u transmetua drejtpërdrejt në Netflix dhe ngjalli jo vetëm entuziazëm, por edhe shqetësime për aspektet etike të transmetimit të drejtpërdrejtë të një aktiviteti kaq të rrezikshëm.
