Pothuajse gjashtëmbëdhjetë vite pas zhdukjes së Bleona Matës, detaje të reja janë bërë publike në emisionin "Pa Gjurmë", në Report TV. Në një bisedë telefonike me gazetaren Odeta Dume, një burrë që pretendon se ka informacion mbi ngjarjen, tregoi se Bleona, e cila humbi në qytetin e Kukësit, është rrëmbyer falë disa njerëzve afër familjes së saj dhe dërguar në qytetin e Vlorës, ku banon dhe dëshmitari.
"Ne kemi informacion që Bleona Matën e kanë sjellë njerëzit e Bukuries në Llakatund. Nga Llakatundi e kanë dërguar në Picar [tjetër fshat i Vlorës]. Këtu e di e shumta e fshatit, por kanë probleme se u del sekreti."
Dëshmitari pretendon se Bleona u rrëmbye nga bashkëshorti i vajzës së një burri që banonte pranë fshatit ku jetonte Bleona, në Kukës. Sipas tij, kjo vajzë kishte një të shkuar si punonjëse seksi në Greqi dhe në kohën kur mori Bleonën, e izoloi në fshatin Llakatund e më pas në Picar të Vlorës.
"Thoshte është vajza ime, por ajo gënjen sepse ajo s'ka vajzë vetë, s'bën fëmijë. Edhe një vajzë tjetër e ka birësuar a nga e ka gjetur, nuk e di. E ka martuar 15 vjeç, e ka marrë prapë dhe kanë ikur në Gjermani."
Sipas telefonuesit, çifti nuk bënin dot fëmijë, por rrëmbyen Bleonën e më pas një tjetër vajzë, të cilat i quanin vajzat e tyre kur i pyesnin në publik. Dëshmitari anonim pretendoi se ata u zhvendosën për një periudhë në Greqi, u kthyen në Vlorë e sot ndodhen në Gjermani. Ai shtoi se mendon se burri i gruas, që kreu dhe rrëmbimin e Bleonës në Kukës, është pjesë e një bande dhe mund të ketë pasur ndihmën e policisë në gjithë këtë ngjarje.
Telefonatën e dëgjoi dhe mamaja e Bleonës, Bukuria, e cila falenderoi telefonuesin, konfirmoi se ka informacione të ngjashme me të dhe apeloi sërish për ndihmë në gjetjen e së bijës.
Bleona humbi gjurmët më 22 maj të vitit 2010, teksa kulloste bagëtinë së bashku me 5 vajza, të afërme të saj. Në atë kohë, por edhe vite më pas, rasti i vogëlueshes, që sot duhet të jetë rreth 22 vjeç, shokoi mbarë opinionin publik, për aq kohë sa nuk kishte asnjë gjurmë që të mund të ndizte një dritë në fund të tunelit dhe dëshmitë ndryshoheshin vazhdimisht.
