Trump kërcënon Kanadanë me tarifa 100% për shkak të marrëveshjes tregtare me Kinën
Presidenti i SHBA-së, Donald Trump, kërcënoi të shtunën se do të vendosë një tarifë 100% për mallrat e importuara nga Kanadaja nëse ky shtet vazhdon me marrëveshjen tregtare me Kinën.
Kanadaja këtë muaj negocioi një marrëveshje për të ulur tarifat për automjetet elektrike kineze në këmbim të taksave më të ulëta të importit për produktet bujqësore kanadeze.
Kërcënimi i Donald Trump vjen pas tensioneve politike mes dy vendeve, të shoqëruara me deklarata provokuese të presidentit amerikan mbi sovranitetin e Kanadasë dhe marrëdhëniet brenda NATO-s.
Oficerët federalë qëllojnë për vdekje një burrë në Minneapolis gjatë një operacioni kundër imigracionit
Agjentët federalë të imigracionit të vendosur në Minneapolis si pjesë e një operacioni të gjerë kundër imigracionit qëlluan për vdekje një burrë 37-vjeçar të shtunën.
Viktima është identifikuar si Alex Pretti, një banor i Minneapolis dhe infermier i njësisë së kujdesit intensiv.
Kryebashkiaku i Minneapolis, Jacob Frey, i kërkoi presidentit të SHBA-së, Donald Trump, t'i japë fund operacionit federal të imigracionit në qytet, i cili ka shkaktuar disa protesta të mëdha dhe të dhunshme.
Ukraina përballet me ndërprerje emergjente të energjisë elektrike pasi sulmet ruse goditën infrastrukturën energjetike
Ukraina po përballet me ndërprerje të menjëhershme të energjisë elektrike, pasi sulmet me raketa dhe dronë rusë goditën Kievin, Kharkivin dhe zona të tjera të vendit, duke dëmtuar ndërtesa banimi dhe objekte të infrastrukturës energjetike.
Kryebashkiaku, Vitali Klitschko, tha se mbetjet e dronëve shkaktuan zjarre në disa ndërtesa, ndërsa furnizimi me ujë dhe ngrohje u ndërpre në disa zona të kryeqytetit, si pasojë shumë qytetarë e kaluan natën në stacionet e metrosë.
Këto sulme vijnë gjatë kohës kur përfaqësues të Rusisë, Ukrainës dhe Shteteve të Bashkuara po zhvillojnë bisedime në Abu Dhabi, mbi bazën e një plani të propozuar nga presidenti amerikan, Donald Trump, për t’i dhënë fund luftës gati katërvjeçare.
Indonezia rifillon kërkimet për rreth 80 të zhdukurit pas rrëshqitjes së dheut që vrau 10 persona
Ekipet e shpëtimit në Indonezi kanë rinisur kërkimet për rreth 80 persona që ende konsiderohen të zhdukur si pasojë e një rrëshqitjeje dheu vdekjeprurëse.
Operacionet e kërkim-shpëtimit u pezulluan përkohësisht për shkak të motit të keq, por kanë rifilluar me ndihmën e ushtrisë, policisë dhe vullnetarëve.
Autoritetet paralajmërojnë se terreni mbetet i paqëndrueshëm, ndërsa përmbytjet dhe rrëshqitjet janë të shpeshta gjatë sezonit të shirave në vend.
