Nuk e dimë nëse e keni marrë vesh, por Meghan Markle ka prezantuar markën e saj të re për mënyrën e jetesës dhe bashkë me të, edhe një reçel, të quajtur “American Riviera Orchard”. Markle ua ka shpërndarë mikeshave të saj, si Chrissy Teigen dhe Kris Jenner, të cilat nuk kanë hezituar ta promovojnë nëpër rrjetet sociale.

Megjithatë, pas bujës, duket se pallati mbretëror e mori paksa personale dhe gjejeni pak se ç’bëri! Përmes një videoje në Instagram, u njoftua se pallati Buckingham ka prodhuar reçelin e vet me luleshtrydhe. Në dyqanin zyrtar të pallatit mbretëror u prezantua produkti i ri dhe njerëzit mendojnë se nuk mund të jetë rastësi. “Reçeli ynë me luleshtrydhe është krijuar nga luleshtrydhet më të mira dhe shërbehet në mënyrë të shijshme në varietete të ndryshme”, shkroi pallati në videon në Instagram.

Njerëzit menjëherë e mbushën videon me komente, duke u shprehur: “Rrituni!”; “Zot, sa fëminore! I bën anëtarët e pallatit mbretëror të duken shumë keq. Jam e lumtur që princi Harry dhe familja e tij vendosën të mos qëndronin atje”; “Mbretëria po kundërpërgjigjet”; “Po mekem! Koha e promovimit të produktit të tyre përputhet me atë të Meghan-it”; “Shije shumë e dobët. Në shumë aspekte”, ishin disa nga komentet që gëluan në reklamën e reçelit prej luleshtrydheje.

A do ketë një dramë të re? S’e dimë, por qëndrojmë në pritje. Ata me reçelë, ne me kokoshka.

Artikuj të sugjeruar: