Aty nga fundi i shtatorit, më datë 20 saktësisht, Capital T u ngjit në skenën fantastike realizuar për koncertin e tij të parë në të tilla përmasa gjatë 10 viteve karrierë. Padyshim koncerti ishte ndryshe nga ç’ishim mësuar, bazuar te përkushtimi, niveli i produksionit dhe të tjera detaje. Ndoshta nisur nga suksesi i tij, Capital T qe i mendimit se Tyga kopjoi skenën e “Time Capsule”.
Capital T, një ndër reperët më të suksesshëm shqiptarë, ka të drejtë të mendojë se sot, falë zhvillimit të internetit, edhe artistët me famë ndërkombëtare mund të frymëzohen/kopjojnë këngëtarët e tjerë nëpër botë, por duket se nuk është ky rasti.
Në një sondazh të Anabel, pjesa dërrmuese e njerëzve mendojnë se është thjesht rastësi dhe jo më kot.
Siç mund ta shihni, koncerti i Tyga-s, ku bie në sy T-ja gjigante në mes të skenës (njësoj si ajo e Capital T), ka ndodhur fillimisht më 22 shtator, vetëm dy ditë pas koncertit të Capital-it në Tiranë. Pra, sa të papërgjegjshëm mund të kenë qenë organizatorët e koncertit të Tyga-s për ta konceptuar dizajnin e skenës vetëm 1 ditë para?!
Së dyti, nuk është hera e parë që Tyga vendos shkronjat e emrit nëpër koncerte, ashtu siç nuk është hera e parë që një artist vendos një ose disa shkronja të emrit si dizajn në skenë.
Së treti, vetë Tyga reagoi në postimin e Capital T duke thënë: “Nuk e kam parë kurrë skenën tënde. Mendjet e mëdha mendojnë njësoj.”
Shtojmë gjithashtu se vendosja e titullit të koncertit “Time Capsule” (që është përdorur më parë nga disa artistë për albumet e tyre) nuk na jep të drejtën të pretendojmë se Capital-i e kopjoi atë; mund të jetë rastësi (si skena e koncertit të Tyga-s) ose Capital T është frymëzuar diku, që në ditët e sotme është mëse normale.
Thënë kjo për të theksuar edhe njëherë që reperi është padyshim një ndër artistët më të talentuar shqiptarë, hitet e vjetra të të cilit dëgjohen ende sot, por nuk i takon Capital-it të “bërtasë” dhe të pretendojë se e kanë kopjuar, kur vetë e di që si ai si gjithë reperët e tjerë, shqiptarë dhe të huaj, nuk kanë dalë autentikë si reperë, por medoemos janë frymëzuar diku, qoftë në ritme, stil, veshje apo beats.
Në ditët e sotme, në një botë ku teknologjia ka sjellë mundësi të përbashkëta në shumë vende, zor se flitet më për origjinalitet. E nëse ka, me gjithë respektin për talentin e artisteve dhe artistëve shqiptarë, zakonisht tiparet themelore të rrymave botërore nuk vijnë nga trojet tona. Të paktën jo deri tani.
