Seriali “Monster” ka publikuar historinë e re, atë të Ed Gein, i cili ndjek vrasësin serial që ka frymëzuar filmat më të njohur horror: “Psycho”; “The Texas Chainsaw Massacre” dhe “Silence of the Lambs”.
Charlie Hunnam luan mjeshtërisht rolin e vrasësit famëkeq, duke na treguar aspektet e fëmijërisë dhe vrasjeve të tij të tmerrshme. Në serial, Ryan Murphy ka bërë një kombinim mes historisë së Ed Gein dhe ndikimit të tij te filmat e famshëm.
Në Wisconsin e ftohtë, në një fermë të izoluar, lindi dhe u rrit një prej burrave që do të frymëzonte një zhaner të ri në kinema: Horrorin drithërues, i cili i bëri njerëzit asokohe të përjetonin ankthin dhe suspancën e Alfred Hitchcock. Emri i tij ishte Edward Theodore Gein, a.k.a Ed Gein, por shumë shpejt, bota do ta njihte si “Monstrën e Plainfield-it”.
Fëmijëria e mbushur me frikë
Ed Gein lindi më 27 gusht 1906, në një familje që do ta formësonte fatin e tij tragjik. Babai i tij, George, ishte një burrë i dobët, i dhunshëm dhe i dhënë pas alkoolit. Nëna, Augusta Gein, ishte e kundërta e tij në çdo drejtim: e fortë, kontrolluese dhe fanatike fetare. Ajo e shihte botën si një vend plot mëkate dhe mësonte djemtë e saj se gratë ishin krijesa të djallit, ndaj i urdhëronte ato t’u qëndronin larg.
Familja jetonte në një fermë të izoluar, larg komunitetit. Augusta e mbante Ed-in dhe vëllain e tij, Henry, nën kontroll të plotë. Ata nuk kishin të drejtë të shkonin nëpër shtëpitë e fqinjëve, të luanin me fëmijë të tjerë apo të flisnin me vajzat. Çdo gjë që Augusta nuk e miratonte, ishte mëkat. Kur djemtë u rritën, Henry filloi ta kundërshtonte ndikimin e nënës. Ai përpiqej t’i tregonte Ed-it se ajo po e manipulonte, por Ed-i nuk donte ta dëgjonte.
Në vitin 1944, një zjarr shpërtheu në fermë. Kur policia mbërriti, Henry u gjet i vdekur. Zyrtarisht, u tha se ishte “aksident”, por shumëkush beson se Ed mund ta ketë vrarë. Nga ai moment, Ed-i mbeti i vetëm me nënën.
Vdekja e nënës
Një vit më vonë, në 1945, Augusta ndërroi jetë nga një goditje në tru. Për Ed-in, ky ishte fundi i botës. Pa nënën, ai nuk kishte asnjë arsye të jetonte. Ai mbylli dhomat ku ajo kishte rrinte, duke i ruajtur si tempuj të çmuar, ndërsa pjesa tjetër e shtëpisë u kthye në rrëmujë e errësirë.
Në vetminë e tij, Ed-i filloi të humbte lidhjen me realitetin. Ai lexonte libra për vdekjen, për anomalitë njerëzore dhe për praktika të çuditshme për “rikthimin e të vdekurve”. Gradualisht, filloi të besonte se mund ta sillte nënën “pranë” në një formë tjetër.
Rruga drejt çmendurisë
Në vitet që pasuan, banorët e Plainfield-it e njihnin Ed-in si një burrë të çuditshëm, por të padëmshëm. Ai ndihmonte fqinjët, kujdesej për fëmijët e lagjes, madje punonte herë pas here në ferma. Askush nuk do ta kishte menduar se brendia shtëpisë së tij, fshehte një realitet të frikshëm.
Netëve, ai vizitonte varreza. Sipas dëshmive së tij, ai shkonte atje vetëm pasi përjetonte “momente të errëta”, kur dëshironte të ndjente praninë e nënës. Ai gërmonte varre të grave që i ngjanin asaj dhe ruante pjesë të trupave, duke u përpjekur të rikrijonte imazhin e saj. Gjithashtu, edhe kryente marrëdhënie seksuale me to (nekrofili). Në mendjen e sëmurë të Ed-it, ajo nuk kishte vdekur; ajo mund të ringjallej nëpërmjet tyre.
Zbulimi që tronditi botën
Më 16 nëntor 1957, Bernice Worden, pronare e një dyqani lokal, u zhduk. Policia gjeti në regjistrin e shitjeve që klienti i fundit i asaj dite kishte qenë pikërisht Ed Gein. Kur hetuesit arritën në fermën e tij, ajo që panë brenda atë që do t’i shënjonte përgjithmonë.
Në shtëpi, midis rrëmujës, ata gjetën prova të një mendjeje që kishte humbur çdo ndjenjë realiteti. Ed Gein u arrestua menjëherë. Në marrjen në pyetje, ai foli me një qetësi të frikshme, duke pranuar vrasjen e Bernice Ëorden dhe një tjetër gruaje, Mary Hogan, si dhe pranoi se kishte hapur varre.
Ai nuk e kuptonte plotësisht peshën e asaj që kishte bërë, sepse në mendjen e tij, gjithçka ishte një ritual i devotshëm për të rikthyer nënën.
Dënimi
Në gjyq, ekspertët mjekësorë e shpallën të paaftë mendërisht për t’u gjykuar. Ai vuante nga skizofrenia dhe psikozë me elementë deluzioni fetar. U dërgua në një spital psikiatrik në Wisconsin, ku jetoi për dekada. Në vitin 1968, u zhvillua një gjyq i dytë dhe këtë herë u shpall fajtor për vrasje, por sërish mbeti në fuqi diagnostikimi si një person lunatik. Ai jetoi pjesën tjetër të jetës në izolim, duke kaluar orë të tëra duke lexuar libra dhe revistat e së kaluarës, i qetë dhe i bindur se kishte bërë “atë që duhej”. Ed vdiq më 26 korrik 1984, nga kanceri, në një spital psikiatrik.
Një emër që u bë mit
Historia e Ed Gein nuk është thjesht një kronikë krimi; është një pasqyrë e errët e asaj që ndodh kur njeriu nuk ka më ndjesi, pa lidhje me realitetin dhe i rritur pa dashuri të shëndetshme. Ai u bë frymëzim për disa prej figurave më të frikshme të filmit horror:
Norman Bates në “Psycho” (1960)
Leatherface në “The Texas Chainsaw Massacre” (1974)
Buffalo Bill në “The Silence of the Lambs” (1991)
Historia e tij është një kujtesë se çfarë mund të ndodhë kur një mendje e brishtë mbetet pa ndihmë dhe pa kontakt me botën e jashtme; një rrëfim që përzien tragjedinë me terrorin, dhe njeriun me hijen e vet.
“Monster: The Ed Gein Story” mund ta shohësh në Netflix, nëse ke zemër të fortë!
