Ismail Morina, i njohur si “Ballisti” që ngriti dronin me flamurin e Shqipërisë së madhe në stadiumin e Beogradit një vit më parë gjatë ndeshjes Serbi – Shqipëri, është arrestuar nga policia e Tiranës mëngjesin e së mërkurës.
Policia ka bërë me dije se pas ndalimit në rrugën "Petro Nini Luarasi", gjatë kontrollit fizik, Morinës i është gjetur në trup një pistoletë e tipit “Zastava” ndërsa në automjetin Range Rover që drejtohej prej tij, është gjetur një tjetër pistoletë e tipit “TT”. Atij gjithashtu i janë gjetur edhe 36 bileta për ndeshjen Serbi-Shqipëri që do të luhet më 8 tetor, edhe pse i është ndaluar hyrja në stadium.
Së bashku me Morinën, në pranga kanë rënë edhe 3 persona të tjerë që e shoqëronin në makinë. Të arrestuarit janë 22-vjeçari Erion Bahushi, 21-vjeçari Denis Balla dhe 20-vjeçari Marin Rexha.
Burimi: top-channel.tv
Përshtati: Kristi Tashi
