Artistja Demi Lovato dhe Jordan Lutes janë zyrtarisht të martuar! Çifti u njoh në studion muzikore në janar të vitit 2022, ndërsa punonin bashkë për albumin e Dem-it, “Holy Fvck”. Pas gati dy vitesh lidhjeje, Jordan i propozoi ish-yllit të Disney në dhjetor të vitit 2023, me një unazë diamanti në formë dardhe.

 
Këtë fundjavë, dasma e tyre u zhvillua në Kaliforni dhe çifti i tha “po” dashurisë. Nusja zbriti në altar e veshur me një fustan ngjyrë të bardhë nga Vivienne Westwood, i realizuar me mëndafsh të rëndë satin dhe me bust të stilit korse.

“Kam qenë një fanse e dizenjove të Vivienne Westwood për shumë kohë”, tha Demi për Vogue, duke shtuar se u rikthehej krijimeve të Vivienne, sa herë që mendonte për fustanin ideal.

Në bashkëpunim me stilisten e saj, Jill Jacobs, Demi e plotësoi pamjen me një vello të bardhë, të gjatë.
 
Fustani u krijua nga ekipi couture i Vivienne Westwood, i cili udhëtoi nga Londra në Los Angeles, për të përmbushur vizionin e Demi-t. Procesi nisi me një foto të një fustani të Westwood që Demi e kishte parë online. Imazhi shërbeu si pikënisje, me ca ndryshime në korse, për të krijuar një model që i përshtatej këngëtares.

“Jo vetëm që u nisëm nga ai frymëzim fillestar, por shtuam edhe detaje që e bëjnë këtë fustan shumë të veçantë për mua,” u shpreh ajo.

Modeli ishte pjesërisht i frymëzuar nga gratë e aristokracisë së shekullit të 18-të, ndërsa forma e poshtme, nga skulpturat greke.

 
Demi, gjithashtu pati edhe një tjetër fustan nga e njëjta markë, me perla dhe një jakë asimetrike. Vëmendja ndaj detajeve është fantastike dhe elementet janë qepur me dorë.

Artikuj të sugjeruar: