Punonjëset e seksit në Amsterdam po protestojnë kundër planeve të bashkisë për të mbyllur lagjen shekullore me dritat e kuqe.
Red Light District (De Wallen) është një destinacion i famshëm në Amsterdam, i karakterizuar nga dritat e kuqe, që i referohet prostitucionit të ligjshëm, ku gra të shumta qëndrojnë pas dritareve duke pritur klientë.
Punonjëset e seksit marshuan nëpër Amsterdam të enjten për të protestuar kundër planeve për t'i zhvendosur ato nga zona e Red Lights në një "qendër erotike" të madhe në periferi të qytetit.
Të veshura me maska për të fshehur identitetin e tyre dhe duke valëvitur çadra të kuqe dhe pankarta, dhjetëra gra shkuan në bashkinë e qytetit.
Autoritetet e Amsterdamit thonë se duan t'i lëvizin punonjëset e seksit për të reduktuar krimin dhe sjelljen e bezdisshme në qytet.
Bashkia ka theksuar se shkaku i problemit nuk janë punonjëset e seksit, por mbipopullimi nga turistët, kriminaliteti dhe probleme të tjera. Por sidoqoftë, ata duhet të gjejnë një zgjidhje.
Banorët pranë Red Lights janë ankuar prej kohësh për cilësinë e jetës në zonë, për shkak të zhurmave të turistëve.
