Çfarë kanë njerëzit sërish me lekët e Jeff Bezos? Janë të pakënaqur.

Po ç’u duhet me lekët e tjetrit? Tani ky “tjetri” nuk është çuni i lagjes. Është njeriu i dytë më i pasur në botë. Besoj biem dakord në këtë pjesë.

Dakord. Po thoje që...? Po thoja që ishte i pranishëm në një organizim bamirësie në Pacific Design Center, qendër për nevojat e komunitetit të dizajnit, argëtimit, artit etj., ku ka hapësira për shfaqje, ekspozita dhe trajnime.

E çfarë bëri Bezos? Praktikisht asgjë.

Që do të thotë? Burime për Page Six bëjnë me dije se “të gjithë prisnin që ai të dhuronte diçka, por nuk e bëri”.

Ma merr mendja prandaj e ftuan. Kush e tha këtë?

Logjika. Qëndron. Burimi tha se “dikush dhuroi 1 milion dollarë. E fill pas kësaj, pak më vonë, Bezos dhuroi 500,000 dollarë”. Në sallë njerëzit nisën të përshpërisnin.

Po ja paskërka dhuruar. Pse mërziten njerëzit? “Nëse dikush tjetër mund të dhurojë 1 milion, Jeff Bezos duhet të dhurojë më shumë,” mësohet të kenë thënë të pranishmit.

Sa më shumë? Më shumë se 500,000 dollarë.

Por $500,000 nuk janë pak? Bezos fiton rreth $142,667 në minutë.

Ah, bashkohem me mendimet e njerëzve atëherë!