Duket se një përgjigje në Instagram pas kritikave në rrjete sociale për ngjarjen në “Just Dance” nuk mjaftoi dhe Dojna Mema ndjeu të nevojshme të fliste sërish, këtë herë me zë dhe figurë. Në një video të postuar në Instagram, Dojna u shpreh:
“Ju e dini që kur them diçka apo duhet të mbaj një qëndrim, gjithmonë e bëj me fytyrë dhe zë sepse dua të jem e drejtpërdrejtë me ju deri në fund dhe jo të gjej diçka të shkruar apo ta mendoj dhe rimendoj dhe ta postoj në rrjetet e mia sociale. Nëse kam pritur dy ditë për të bërë një reagim me fytyrë dhe me zë ka ndodhur sepse për mua kanë qenë realisht tre netë shumë të vështira. Gjendem në një situatë që do të doja të mos isha gjendur kurrë në jetën time. E kam menduar, stërmenduar çfarë mund të kisha bërë mirë nëse do të kisha kthyer kohën mbrapa dhe sigurisht me atë çfarë ndodhi dhe unë do të kisha reaguar ndryshe, por në fund të ditës kjo na bën të bukur dhe kjo na bën njerëz; që nuk jemi robot, që nuk kemi gjithmonë planin e duhur në momentin e duhur dhe unë jam njerëzore, ndodh të mos kem fjalën e duhur në momentin e duhur. Më vjen vërtet shumë keq që në atë moment të caktuar nuk gjeta fjalët që ju do të donit të kishit thënë nga shtëpia, ashtu siç kam bërë thuajse në çdo rast tjetër.”
Në vijim shtoi:
“Po mendoja sot dhe po bëja debat me një mikeshën time. Ajo kishte një mendim shumë interesant. Më tha: ‘Dojna, ka një problem. Në momentin që dy njerëz janë fizikisht aty të pranishëm dhe po i përgjigjen dhe kundërpërgjigjen njëri-tjetrit, në momentin që ti merr përsipër të flasësh mbi një vajzë që është fizikisht aty, në një formë, ti po nënvlerëson inteligjencën e atij personi që është fizikisht aty dhe i aftë për të mbrojtur veten. Në atë rast konkret, mua të paktën m’u krijua përshtypja që me përgjigjen që Bela dha, i vuri gjërat në vend. Por mesa duket nuk ishte ashtu kur e pashë edhe nga ekrani.”
Dojna theksoi se gjithë çfarë ndodhi nuk ndryshon asgjë në bindjet e saj mbi diskriminimin.
“Më vjen keq që në atë moment të caktuar nuk u tregova zëri juaj. Kjo nuk ndryshon absolutisht bindjet e mia, të cilat vazhdojnë të qëndrojnë shumë të forta, shumë të qëndrueshme mbi çfarëdo diskriminimi, qoftë ky për gjininë, për preferencat seksuale, për ngjyrën e lëkurës dhe gjithçka tjetër. Unë do mbetem gjithmonë nga ana juaj dhe pres ndonjëherë edhe pak mirëkuptim nga ana juaj.”
Për të gjithë ata që nuk janë përditësuar: Në “Just Dance”, Albi Nako iu drejtua një 40-vjeçareje, ndër të tjera, duke i thënë se ajo duhet të martohet dhe bëjë fëmijë dhe jo të konkurrojnë me të rinjtë. Pas kësaj, njerëzit kritikuan koreografin, por edhe Dojnën, e cila sipas tyre duhet të kishte reguar. Për Top Albania Radio, Nako u shpreh se e gjitha ishte e stisur në mënyrë që Bela të promovohej. Të njëjën gjë tha edhe 40-vjeçarja për Xing.al.
