Në korrik të 2019-ës, grupi Just X i përbërë nga dy djem misteriozë, publikoi këngën e parë në bashkëpunim me një këngëtare të re, Eugena Aliun. Më pas, një remix i këngës “Dikur” të Alban Skënderajt u përgatit nga Just X. Ata kanë publikuar gjithashtu edhe remix-in me Muharrem Ahmetin të këngës “Tavolina e mërzisë” të Elvana Gjatës, remix që tashmë është fshirë nga YouTube.

Megjithatë, vëmendjen më të madhe ky grup e ka marrë së fundmi. Në maj të 2020-ës, ata publikuan këngën “Vuj” dhe këtë javë këngën “Ma thave lotin”, me të cilën konkurrojnë tek Jeho, në Top Channel. Veshja e tyre totalisht e zezë, pajisja me maska, që iu mbulojnë tërësisht fytyrën (jo nga ato të koronës), morën direkt vëmendjen e jurisë dhe publikut. Titujt, tekstet dhe muzika janë të ngjashme me produksionet e Three Dots, por, sikur të mos mjaftonte kjo, zëri i njërit prej këngëtarëve është shumë i ngjashëm me atë të Flori Mumajesit.

Provoni ta dëgjoni pa e parë videon dhe do të vini dorën në zjarr që po këndon Flori. Diçka e tillë u ka rënë në sy dhe komentuesve, të cilët janë të bindur që pas misterit të maksës fshihet ai. Ndërkohë që një pjesë mendojnë se anëtari tjetër i grupit është Bruno ose Vik Kraja.

“E sigurt do jetë ndonjë surprizë dhe do dali Flori Mumajesi me shokun e vet që të tregoj publikut që dhe pa emër dhe të mbuluar kënga bëhet HIT”, “zëri Florit Mumajesit komplet zëri i tij”, “Si zëri i Flori Mumajesit”, “Super zë çunat suksese të mëtejshme”, “Flor Mumajesi 2”, “Flori Mumajesi njëri nga këta”, “Timbri i zërit si Threedots, Flor Mumajesi”, janë vetëm disa prej komenteve të publikut.

Gjithsesi, përpara se të vëmë dorën në zjarr, presim të hiqen maskat, se nuk i dihet.