Për herë të parë, Lidhja Demokratike e Kosovës zgjodhi si kandidate për kryeministre në zgjedhjet e ardhshme në tetor Vjosa Osmanin, e cila është po ashtu gruaja e parë që kandidon në një post drejtues të tillë. Ndonëse pjesëmarrja e grave në politikën e Republikës së Kosovës ka patur ndryshime (kujtojmë Atifete Jahjagën si presidente), studime të shumta kanë theksuar se pjesëmarrja e grave në vendimarrje në Kosovë nuk është fort e lartë. Prandaj edhe zgjedhja e Vjosa Osmanit duket si një hap përpara.
Osmani nuk është një emër i panjohur në fushën politike, përkundrazi është e angazhuar që në adoleshencë si aktiviste e LDK-së. Pasi mbaroi studimet në Fakultetin e Drejtësisë në Kosovë, Vjosa Osmani, asokohe e shpallur si studentja më e mirë, vazhdoi studimet e nivelit Master në Universitetin e Pitsburg-ut në Amerikë, ku u vlerësua me “Sheth International Achievement Award”, çmim që jepet për kontributin e të rinjve në mbarë botën.
Përveç profesionit të pedagoges, prej tre mandatesh, Osmani është deputete e LDK-së, ku në dy të fundit ishte deputetja më e votuar në Kosovë.
