Ndihesh pak keq kur sheh poza të përsosura në Instagram? Flokë të lagur, por të rregullt. Bark të sheshtë, pavarësisht darkës me makarona. Kofshë të lëmuara që reflektojnë dritën si reklamat e vajit të trupit. Edhe ne. Por, pastaj vjen Aulona Musta – që s’lë ditë pa bërë palestër – dhe na kujton se pushimet nuk janë vetëm për poza fotomodelesh.
Në një postim të fundit në Instagram, Aulona hodhi disa foto të saj në plazh që, le të themi, "nuk janë bërë" për explore page-in e Instagramit. Një ku është e ulur dhe i duket barku i fryrë. Një tjetër ku celuliti në kofshë duket qartë. Dhe një tjetër ku në fytyrën pa make-up shihen disa akne. Dhe më pas, ajo shkruan:
“Ky është gjithashtu plazhi. Jo vetëm ai me pozat perfekte, flokët e shtrira dhe dritën magjike që të nxjerr yll. Por edhe ky, me flokët e çrregullt nga era dhe kripa, me fytyrën pa make-up ku duken aknet, me barkun e fryrë kur ke ngrënë shumë dhe qëndron lirshëm, celulitin në dritë të diellit dhe çdo 'papërsosmëri' që rrallë guxojmë ta ndajmë.”
View this post on Instagram
Dhe nëse menduat se ky ishte një shfajësim për ditë të këqija, jo. Ishte një deklaratë. Një rikujtesë që “trupi i verës” nuk ka një formë të vetme. Madje ka shumë forma, që nuk filtrohen për t'u përshtatur me standardin e zakonshëm të rrjeteve sociale.
“Sepse edhe kjo është pamja e jetës. Edhe kjo është pamja e pushimeve. Edhe kjo është pamja e një gruaje që shijon momentin pa stresin për të qenë 'e përkryer'.”
Tani, le të ndalemi një sekondë. Kjo vjen nga një grua që e dimë se ka vite që merret me palestër, që e trajton mirë trupin e saj dhe e promovon jetën aktive. Pra, kur dikush që i përmbahet rregullsisë, ushqimit të shëndetshëm dhe një jete dinamike vendos ta thotë troç se “trupi i rregullt ka gjithsesi bark të fryrë dhe celulit”, ndoshta duhet ta dëgjojmë me më shumë kujdes.
Në fund të postimit, ajo shkruan:
“Këto foto jo vetëm që mund të postohen, por duhet të postohen. Që vajzat dhe gratë të mësohen të ndihen rehat edhe në trupin e tyre real, jo vetëm në versionin e kuruar që do Instagrami. Sepse kur fillojmë të ndajmë edhe këtë anë të medaljes, i japim njëra-tjetrës leje për të qenë vetvetja. Dhe kjo është fuqia e vërtetë – të mos kesh frikë të jesh vetvetja me çdo imperfeksion.”
Dhe sinqerisht? Aulona ka plotësisht të drejtë. Jo çdo ditë është për t'iu përshtatur filtrit, ndonjëherë është thjesht për t'u jetuar. Për të ngrënë pak më shumë drekë, për të shijuar diellin e ngrohtë dhe për të mos e rregulluar barkun me photoshop.
Artikuj të sugjeruar:
