Sezoni i tretë dhe i fundit i "Squid Game" nuk është për zemrat e dobëta. Në fakt, edhe vetë krijuesi i serialit, Hwang Dong-hyuk, paralajmëron:
“Toni është edhe më i errët. Bota ka më pak shpresë dhe unë doja ta pasqyroja këtë.”
Sezoni i parë ishte tronditës. I dyti, edhe më brutal. I treti? Një reflektim mbi hakmarrjen, dhunën dhe ç’do të thotë të jesh njeri në një sistem që të çnjerëzon. Në këtë kapitull të fundit, nuk mungojnë lojërat e reja, personazhet surprizë dhe kthesat dramatike, por iluzioni i një fundi të lumtur? Harrojeni.
“Disa histori thjesht nuk mund të kenë një happy ending, përndryshe do të humbisnin thelbin,” thotë Hwang.
Dhe ky qëndrim është i qartë në çdo episod të sezonit të tretë. Vrasje në mënyra "kreative", personazhe që transformohen nën presionin ekstrem dhe një klimë morale gjithnjë e më e turbullt.
Edhe pse seriali nisi për të qenë një sezon i vetëm, suksesi ndërkombëtar bëri që Hwang të rikthehej me dy sezone të tjera, të xhiruara pa pushim. Aktori Lee Jung-jae, që luan Gi-hun, thotë se finalja është e paparashikueshme:
“As vetë nuk e prisja si do përfundonte. Reagimet do jenë të forta dhe të ndryshme.”
A do të ketë një rikthim të mundshëm në ndonjë formë a një tjetër të "Squid Game"? Hwang nuk e përjashton si mundësi:
“Ndoshta një spin-off (histori e re e lidhur me një personazh ose ngjarje), ndoshta një histori që ndodh paralelisht. Ka ende gjëra të pathëna.”
Ndërkohë, fansat duhet të përgatiten. Fundi po vjen dhe duket se nuk do të jetë kafshatë e lehtë për t’u kapërdirë. Traileri i sezonit të tretë është publikuar, ndërsa data zyrtare e nisjes së tij është 27 qershori.
Burimi: The Guardian
