Pas komenteve kritikuese të ndjekësve në profilin zyrtar të Revistës Class në Instagram, faqja është detyruar të bllokojë komentet në dy postimet që shkaktuan debat të ashpër: një për motrat Vjollca dhe një për Xhemi Shehun.
Siç mund ta shihni, në postimin për Marinën dhe Luanën, mungon teksti për sheikët e Dubait që “çmendën” vajzat e showbizit shqiptar. Teksti është zëvendësuar me “motrat Vjollca në Dubai”.
Ndërkohë që nga ana tjetër, teksti polemik për Xhemin qëndron ende, por ndjekësit e kanë të pamundur të komentojnë.
Përsa i përket personit që qëndron pas postimeve, nisur nga komentet në Instagram, duket se përgjegjëse është menaxhuesja e faqes, e cila u prezantua me emrin Xhesi.
“Aman mos më sulmoni mua tani. Se drejtuesja jonë është shumë, por shumë fisnike dhe s’i pëlqen këto diskurse që shpesh i quan banale/ më vjen keq që e futa në telashe se ajo është e mirë dhe kur i bëjnë keq! Edhe kur e tallin dhe ironizojnë! Edhe kur e akuzojnë se ble fustane me taksat e shqiptarëve megjithëse ka 8 vjet që drejtoj [sic] një Biznes Fustanesh, edhe kur s’i thonë Faleminderit që bëri që Festivalit t’i kthehej zhurma që i kish munguar, por i kërkojnë llogari pse bëri show siç di ajo të bëjë show. Unë e di që drejtuesja ime e paguan me heshtje këtë dhe dua shumë t’i ngjaj, por kur firmosa kontratën e punës kërkova që të mos më censuronte. S’besoj se kam ofenduar njeri, s’besoj që kam bërë diçka jo etike. Siç bën Xhemi dhe shokët e saj shaka e ironi, ju ktheva dhe unë në mënyrën naive. Ngremë gotat tani se është 2020 dhe duhet harmoni dhe paqe!” shkruan menaxherja e faqes.
Ndërkohë duket se ndjekësit vazhdojnë të mos e kursejnë ironinë, qoftë edhe në postimet e tjera të Revista Class, ku Xhemi është në qendër të vëmendjes nëpër komente.
