Ndjekja dhe distancimi janë dy nga mënyra (më të zakonshmet) që njerëzit zgjedhin në situata stresante, me qëllimin për t'u ndjerë më mirë. Sigurisht që marrëdhëniet janë më të shëndetshme kur asnjëri prej partnerëve nuk ka prekur ekstremet dhe të dy përpiqen t'i ndërthurin modelet duke ruajtur balancën. Gjithsesi nuk mund të themi që si ndjekja ashtu dhe distancimi janë "mënyra të mirë apo të këqija", por bëhen problematike nëse asnjëri prej partnerëve nuk përpiqet ta shohë situatën me sytë e tjetrit.
Si fillim, zbulo ku përket ti.
Ndjekësit
1. Reagoni ndaj ankthit duke u përpjekur të jeni edhe më të afërt (të bashkuar) me njëri-tjetrin në çift.
2. I kushtojnë shumë rëndësi thënies së gjërave siç janë dhe shprehjes së ndjesive dhe besojnë se tjetri duhet të bëjë gjithashtu të njëjtën gjë.
3. Ndihen të refuzuar dhe e marrin shumë personale kur partneri do më shumë kohë veten apo larg marrëdhënies.
4. Ke tendencën ta ndjekësh edhe më shumë kur ai/ajo largohet dhe kur përpjekja dështon kalon në panik.
5. Mund ta etiketojnë veten si «tepër të varur», «tepër kërkues» ose «tepër të bezdisshëm» në marrëdhënien e tyre.
6. E kritikoni partnerin si dikë që nuk përballon dot ndjesitë apo nuk e ka shumë qejf afrimitetin.
7. Kur jeni në gjendje ankthi kërkoni prej tij me urgjencë mbështetje emocionale.
Distancuesit
1. Kërkojnë distancë emocionale përmes distancës fizike kur niveli i stresit tek ta është i lartë.
2. Konsiderojnë veten si persona që mbështeten tek vetja dhe si persona privatë.
3. E kanë shumë të vështirë të tregojnë anën e tyre më të ndjeshme, të tregohen të varur apo të thonë se kanë nevojë për diçka.
4. Nga partneri juaj merrni shpesh epitete të tipit: "i padisponueshëm", "të përmbajtur", "emocionalisht të mbyllur", etj.
5. Stresin e martesës preferojnë ta kalojnë duke u përkushtuar tek projektet e punës apo duke u fokusuar tek sporti.
6. Kanë tendencën t'i japin shumë shpejt fund konfliktit duke thënë se "s'ja vlen të diskutosh më".
7. Janë më të lirshëm të hapen kur nuk ndjejnë që partneri po i ndjek, po i bën "presion" apo kritikon.
Cilësdo kategorie t'i përkisni, duhet të dini që nëse ndiqni një distancues, ata do të distancohen edhe më shumë dhe nëse distancoheni nga një ndjekës, do të ndiqeni edhe më shumë prej tij.
Në shumicën e lidhjeve, ai që "ndjek" është po ai që shqetësohet më shumë për distancën dhe gjithmonë gati për të bërë diçka që gjërat të ndryshojnë. Nga ana tjetër, distancuesi mund të ndihet keq për mënyrën sesi gjërat po shkojnë në marrëdhënie, por me shumë gjasa s'do të bëjë asnjë lëvizje për të ndryshuar.
Ajo çfarë duhet bërë për ta mbajtur marrëdhënien të shëndetshme dhe jetëgjatë, është fillimisht respektimi i mënyrave të secilit dhe gjetja e një balance mes ndjekjes dhe distancës.
Burimi: Psychology Today
