Dizajneri i modës, Giorgio Armani, ka ndërruar jetë në moshën 91-vjeçare, njoftoi sot Grupi Armani.
“Il Signor Armani, siç e quanin gjithmonë me respekt dhe admirim punonjësit dhe bashkëpunëtorët, ka ndërruar jetë paqësisht, i rrethuar nga të dashurit e tij", tha Grupi Armani në një deklaratë, duke e përshkruar themeluesin si “një forcë e palodhur.”
“Në këtë kompani, gjithmonë kemi ndjerë sikur jemi pjesë e një familjeje. Sot, me ndjesi të thella, përjetojmë boshllëkun që la ai që themeloi dhe rriti këtë familje me vizion, pasion dhe përkushtim",
I njohur për dekada me radhë në industrinë e modës, Armani ka ndërtuar një markë që shquhet për autenticitetin dhe paraqitjen fantastike nëpër tapetet e kuq të Hollywood-it.
Në qershor 2025, Armani nuk ishte i pranishëm gjatë Javës së Modës, ku u prezantua koleksioni i ri i Armani-t për meshkuj në Milano. Kjo ngjarje shënoi mungesën e parë të tij në një sfilatë mode të markës së njohur.
Giorgio Armani lindi më 11 korrik 1934 në Piacenza, Itali. Ai ishte fëmija i dytë i një familjeje të thjeshtë. Fëmijëria e tij u ndikua shumë nga periudha e Luftës së Dytë Botërore, ku pa nga afër pasojat e varfërisë dhe pasigurisë, përvoja që e bëri të vlerësonte më shumë thjeshtësinë dhe disiplinën, të cilën e transmetoi edhe në krijimet e tij të mëvonshme.
Fillimisht, ëndërronte të bëhej mjek dhe studioi për pak kohë në Universitetin e Milanos për degën e mjekësisë, por më pas e ndërpreu shkollën për t’u orientuar drejt artit dhe dizajnit.
Fillimet e karrierës
Në vitet ’50, Armani nisi punë si dekorator dritaresh në "La Rinascente", një nga qendrat më të famshme tregtare në Milano. Ky ishte kontakti i parë i tij me botën e modës. Në vitin 1961, ai iu bashkua shtëpisë së modës "Nino Cerruti", ku dizajnoi linjën e veshjeve për meshkuj. Përvoja te kjo markë i dha mundësinë të zhvillonte stilin e tij të pastër dhe elegant, që më vonë do ta bënte të famshëm.
Themelimi i markës Armani
Në vitin 1975, bashkë me partnerin e tij të jetës dhe të biznesit, Sergio Galeotti, themeloi kompaninë "Giorgio Armani" në Milano. Ai nisi të krijonte linjat e para të veshjeve për meshkuj dhe shpejt për femra, duke thyer rregullat e kohës. Kostumet e tij u bënë të njohura për prerjet e pastra, siluetat e lirshme dhe thjeshtësinë elegante, një stil që u shndërrua në simbol të sofistikimit italian.
Suksesi ndërkombëtar
Në vitet ’80, Armani fitoi famë globale falë bashkëpunimit me Hollywood-in. Ai ishte stilisti që solli elegancën italiane në tapetin e kuq, duke veshur aktorë si Richard Gere, Sean Connery, Michelle Pfeiffer dhe shumë të tjerë. Filmi "American Gigolo" (1980), ku Richard Gere veshi kostume Armani, ishte një moment kthese që i hapi dyert e suksesit botëror.
Marka e tij u zgjerua në linja të shumta: "Emporio Armani", "Armani Exchange", "Armani Privé", si dhe "Armani Jeans". Gjithashtu, edhe në fusha të tjera si parfume, orendi shtëpiake, hotele dhe restorante. Kjo e bëri një nga perandoritë më të fuqishme të modës në botë.
Stili dhe filozofia
Armani njihet për stilin minimalist, të rafinuar dhe gjithmonë elegant. Ai shpiku konceptin e “power suit” ("kostumi i fuqisë") që u bë simbol i grave në botën e biznesit në vitet ’80. Për të, veshja duhej të ishte një kombinim i thjeshtësisë, bukurisë dhe rehatisë.
Armani la pas një trashëgimi të jashtëzakonshme. Ai nuk ishte thjesht një dizajner, por një revolucionar i modës që ndryshoi mënyrën se si njerëzit vishen dhe perceptojnë elegancën. Sot, marka Armani konsiderohet si një nga më të fuqishmet në botë, sinonim i luksit, klasit dhe stilit italian.
