Chris Rea, këngëtari dhe autor i këngëve, më i njohur për hitin “Driving Home for Christmas”, ka ndërruar jetë në moshën 74-vjeçare, njoftoi familja e tij.
Rea vdiq në spital pas një sëmundjeje të shkurtër, sipas një deklarate nga familja e tij për agjencinë britanike të lajmeve Press Association.
Rea u bë i famshëm në vitet '80 në Britani me hite si “Fool (If You Think It’s Over)” dhe “Let’s Dance”.
Ai njihet më së shumti për këngën e tij të njohur “Driving Home for Christmas”.
Dy nga albumet e tij studio, “The Road to Hell” në 1989 dhe “Auberge” në 1991, arritën vendin e parë në Britani.
“Driving Home for Christmas” nuk u bë hit menjëherë kur u publikua për herë të parë në 1986, por kënga e butë rezultoi një sukses i qëndrueshëm gjatë dekadave dhe mbetet një nga këngët më të dashura festive.
Këngëtari lindi në vitin 1951 në Middlesbrough, në veriperëndim të Anglisë, nga një baba italian dhe një nënë irlandeze. Ai punoi në vende të ndryshme pas përfundimit të shkollës dhe ndihmoi në biznesin familjar të akulloreve.
Ai mori kitarën për herë të parë në moshën 21-vjeçare dhe luajti në disa grupe para se të niste karrierën solo.
Rea ka pasur dy albume të renditura në vendin e parë në Britani në 1989 dhe 1991.
Ai kishte vuajtur nga probleme shëndetësore, përfshirë kancerin e pankreasit, dhe kishte pësuar një goditje në tru në vitin 2016. Në vitet e fundit u largua nga muzika pop dhe publikoi disa albume me tinguj blues.
Chris Rea la pas gruan dhe dy vajzat e tij.
