Edhe unë që s’kam parë ndonjë telenovelë të saj (kam parë të tjera, të kuptohemi), e njoh Aracely Arambula-n. Është një ndër aktoret më të famshme në botën e telenovelave latine dhe gjejeni pak: ka shumë fansa në Shqipëri dhe tani e di.
Seriali “La Doña” (Zonja) që ka Arambula-n si protagoniste transmetohet në kanalin “Stinët” në Digitalb dhe ka ndjekës besnikë që kanë hapur edhe faqe fansash në Instagram, ku bëjnë postime për aktoren.
Një prej këtyre faqeve poston rregullisht foto dhe video të saj dhe së fundmi, i dërgoi Aracely-t asaj një video të kapur nga ekrani me titra shqip. Për të treguar se fama e “La Doña-s” ka ardhur deri në Shqipëri, Aracely e postoi videon në Instagram duke përshëndetur fansat e saj shqiptarë dhe duke shkruar se është shumë e lumtur që puna e madhe për këtë serial iu shpërblye.
“Sa e lumtur jam që “La Doña” transmetohet në kaq shumë shtete”, shkruan ajo duke etiketuar fansat shqiptarë, “Ekip fantastik. Faleminderit për punën, lodhjen dhe përkushtimin, që gjithmonë jep fryte.”
Më në fund, na doli nami për fansa të zjarrtë telenovelash deri në Meksikë. Edhe lodhja dhe përkushtimi ynë u shpërblyen, herët apo vonë.
