Brezi i ri i këngëtarëve dhe personazheve më të njohur shqiptarë janë adoleshentët e dikurshëm që konkurruan në spektaklet e talenteve, apo ata që që në moshë shumë të re, qenë menjëherë shumë të suksesshëm.
Duke parë në Instagram disa nga vajzat e njohura shqiptare, u kujtuam se sa ndryshe ishin kur dolën në fillim, plot naivitet dhe emocione. Sot, ato pozojnë plot vetëbesim dhe si në stil, ashtu edhe në videoklipet që bëjnë, tregojnë se janë rritur me plot kuptimin e fjalës.
Përshembull Xhensila Myrtezaj. Ajo tani është një grua e martuar dhe po mendon të krijojë një familje të madhe me Bes Kallakun, por në fillimet ka qenë vajza e qeshur me sjelljen e pafajshme tek “Ethet 4”, edicioni i fundit i këtij spektakli.
Shikoni si është veshur për të konkurruar në skenë, sipas trendeve të asaj kohe (kapele, xhaketë e shkurtër sipër një bluze të ngushtë të gjatë).
Dhe shikoni me sa emocion e pret vendimin e jurisë nëse do të vazhdojë apo jo garën.
Pak më e rritur dhe më e sigurt në skenë, edhe pse me një koreografi free style, u shfaq vite më vonë në “Top Fest”, ku konkurroi me këngën “A më do”. Veshja dhe grimi nuk janë ndër më të kuruarat, sigurisht.
Pak kohë pas kësaj do të bëhej e ditur lidhja e saj me Besin dhe më tej, ajo do të konkurronte tek “Kënga Magjike” me këngën “Me ty jam”, ku u shfaq me këto flokë dhe me këtë grim:
Në intervistën në prapaskenën e “Këngës Magjike”, edhe zëri i Xhensilës kur flet është shumë më ndryshe nga tani, i hollë dhe shumë lozonjar:
Dhe ja sa ndryshe është stili i saj në videoklipet e reja, “Lova” me Granit Dërgutin dhe “Si të jem mirë” me Irkenc Hykën. Xhensila s’është më e qeshur dhe e pafajshme: ka përshtatur një stil më trasgresiv dhe një qëndrim më serioz.
Po kështu edhe shoqja e saj Samanta Karavello. Samantën e kemi njohur tek “Ethet 2”, kur ishte 14 vjeçe, me këtë fytyrë kaq, kaq të pafajshme.
Pas mbarimit të “Etheve”, Samanta me ish-konkurrentët morën pjesë në Festivalin e Këngës, ku Samanta ishte përsëri, sigurisht, konkurrentja më e re. Ajo konkurroi në festivalin e 2006-ës me këngën “Ylli im polar”.
Qëndrimi në skenë s’ishte ndër më të mirët. Por s’është për t’i vënë faj se pasi ke qenë me muaj të tërë nën gjykimin e ashpër të jurisë me përvojë gjysmëshekullore në muzikë, nuk ke vetëbesimin më të madh dhe përveç kësaj, vazhdonte të ishte 14 vjeç.
Ca vite më vonë, Samanta nuk i kishte ende kaq të shpeshta videoklipet e këngëve, por këndonte tek-tuk në ndonjë festival apo spektakël televiziv. Akoma mbahej mend si Samanta e vogël e “Etheve”, kur këndoi në emisionin “Histori dashurie” në 2009-ën. Edhe stili i saj vazhdonte të ishte po aq vajzëror dhe i ëmbël, plot lule dhe frude dhe fjongo.
Pastaj befas, vendosi të ndryshonte krejtësisht stil dhe të shfaqej me një look prej gruaje të fortë e të pavarur në Top Fest, ku konkurroi me këngën “Femër Fatale”.
Megjithatë, veshja e zezë me perçina, flokët e zinj dhe grimi i rëndë s’ia fshehin dot fytyrën prej bebusheje.
Pas kësaj do t’u hynte videoklipeve me kokë. Kënga e saj e parë që u kthye në hit shumë të njohur nga publiku ishte “Ti s’e din se” me Onat. Këtu, Samanta shfaq një shndërrim të menjëhershëm, duke treguar më shumë lëkurë se ndonjëherë më parë dhe shumë më shumë sensualitet.
Dhe shikoni ç’vetëbesim kanë sytë e saj.
Këngëtarja ka pranuar ndërhyrjen në hundë dhe ka ndryshuar krejtësisht stil. Me look-un në klipet e reja, i vë pikat mbi “i” se nuk është në asnjë lloj mënyre vajza e vogël e pasigurt e “Etheve”.
Një histori ndryshe ka Era Istrefi. Këngëtarja tani e famshme shqiptare nëpër botë, u bë fillimisht e njohur si motra e vogël, bjonde, rebele, e Nora Istrefit. Kënga e saj e parë “Mani për money” u publikua me shumë promovim nga ana e së motrës por edhe e faqeve të VIP-ave shqiptarë në rrjetet sociale, që lajmëronin shpesh se Era, motra e Norës, do të publikonte një këngë.
Duhet thënë se Era që atëherë e kishte përcaktuar mirë stilin e saj: bohem dhe hippie. Vijon ta ruajë këtë stil edhe sot.
Sidoqoftë, pasi eksperimentoi me rastat dhe ngjyra të ndryshme flokësh, Era tani shfaqet me një look më të pastruar, brenda çrregullsisë së stilit të saj.
Kjo u dallua qartë tek videoklipi i këngës “Bonbon” që e bëri të famshme në të gjithë botën. Era e kishte kuptuar se që të godasësh, nuk duhet ta komplikosh shumë veten. Prandaj s’bëri ndonjë gjë të madhe, përveçse veshi këtë parkan e famshme me pellush rozë që urojmë të mos e shikojmë edhe këtë dimër nëpër rrugë.
Videoklipi i saj i parë për tregun ndërkombëtar, “Redrum” e solli prapë bjonde, por shumë larg stilit të saj të përhershëm, që deri atëherë gjithçka përveçse monokrom.
Siç duket, Era vendosi të qëndrojë tek një stil paksa më i thjeshtë, pasi kohëve të fundit e shikojmë të veshur më dark, me ngjyra të errëta dhe së fundmi, i është kthyer edhe ngjyrës natyrale të errët të flokëve.
Beatriks Ramosaj ka rënë shumë në sy kohëve të fundit për përpjekien për të ndryshuar krejtësisht në videoklipin e këngës “Pa ndjenjë”.
E veshur në të zeza, në një stil ku ndërthuret Rihanna në epoka të ndryshme të saj me Tomb Raider-in, Beatriks Ramosaj do që gjithçka të jetë seksi, duke përfshirë skena në shtrat që nuk janë të censuruara sa ç’mund të prisnim.
Por më parë, edhe Beatriksi kishte një stil shumë më pak të dallueshëm dhe më amator. Tek videoklipi i saj i parë, “Let me love you” në 2011-ën, ajo shfaqej me flokë që ia frynte era pra, freskuesja, dhe sy të lyer me një penel të trashë të zi me bisht në të dyja anët e syrit.
Pastaj po atë vit tek “Kënga Magjike”, Beatriksi u shfaq me një grim akoma më të rëndë tek sytë dhe qerpikë të vënë aq të mëdhenj, sa mezi i mbante sytë hapur. Ajo konkurroi me këngën “Dilema”.
Sidoqoftë, origjina e këngëve seksi të Beatriksit daton në 2013-ën kur konkurroi në “Top Fest” me këngën me titullin provokues: “Prekem ngadalë”. Teksti nuk ka asnjë element erotik dhe kënga është në stilin jazz-blues. Veshja gjithashtu është shumë klasike.
Në 2015-ën, Ramosaj tentoi përsëri në “Top Fest” me një tjetër këngë seksi por këtë herë, përmbante vërtet motive seksi.
Performanca e saj në finalen e “Top Fest 12” përfshin një body të zi lëkure, balerina të veshura si Beatriksi dhe kërcim në tubin e baletit, ku Beatriksi tregon edhe të pasmet e zhveshura.
Kështu që s’është për t’u çuditur që Beatriksi të mbetej tek këngët provokuese, por ka patur gjithmonë eksperimente me këngë më profesionale dhe stil të veçantë.
Sidoqoftë, nga fillimi e deri tani, ndryshimi është shumë i dukshëm.
Nga një vajzë që s’dilte shumë jashtë kornizave xhinse-bluzë-fustan klasik, tani Beatriksi duket shumë e bindur se dëshiron të krijojë impakt me stilin e vet dhe po përpiqet të hyjë në rangun e fashionistave.
Copyright Anabel.al / Ndalohet ribotimi pa lejen e redaksisë.
