Meghan Markle, Dukesha e Sussex, publikoi një deklaratë ku mbron veten pas një raporti në The Times of London, ku citohen burime pa emër të pallatit që e akuzojnë atë për bullizëm të ushtruar ndaj stafit në vitin 2018, kohë kur jetonte në Pallatin Kensington me princin Harry.

Publikimi në gazetën britanike, i cili vjen vetëm disa ditë para se të transmetohet një intervistë goxha e komenduar midis çiftit mbretëror dhe Oprah Winfrey, u quajt "një fushatë e përllogaritur" nga një zëdhënës i Dukës dhe Dukeshës së Sussex-it.

Historia e pretenduar citon një email të vitit 2018 të Jason Knauf, ish-sekretari i komunikimit i Harry dhe Meghan, i cili dyshohet se iu dërgua një zyrtari të lartë mbretëror ku thuhet se ai ishte “shumë i shqetësuar që dukesha kishte bullizuar dy asistentë personalë” dhe kishte “zvogëluar besimin e një anëtari të tretë të stafit”.

Në email thuhet gjithashtu se "dukesha duket se synon të ketë gjithmonë dikë me të cilin të merret”.

"Le ta quajmë thjesht siç është - një fushatë e përllogaritur e bazuar në keqinformim mashtrues dhe të dëmshëm", tha një zëdhënës i princit Harry dhe Meghan-in përmes një deklarate për NBC News.

"Ne jemi të zhgënjyer për të parë këtë portret-shpifje të dukeshës së Sussex nga një media. Nuk është rastësi që akuzat e shtrembëruara disa-vjeçare, që synojnë të zvogëlojnë fuqinë e dukeshës, po publikohen për mediat britanike pak para se ajo dhe duka të flasin sinqerisht për përvojën e tyre të viteve të fundit.”

Ditën e sotme, Pallati Buckingham publikoi një deklaratë ku thotë se do të hetojë mbi pretendimet e publikuara.

"Ne jemi të shqetësuar për akuzat në The Times pas pretendimeve të bëra nga ish-anëtari i stafit të dukës dhe dukeshës së Sussex. Prandaj, ekipi ynë do të shqyrtojë rrethanat e përshkruara në artikull. Anëtarët e stafit të përfshirë në atë kohë, përfshirë ata që kanë lënë familjen, do të ftohen të marrin pjesë për të parë nëse ka gjëra prej të cilave mund të mësojmë. Familja mbretërore ka një politikë të Dinjitetit në Punë prej vitesh dhe nuk toleron dhe nuk do të tolerojë bullizimet ose kërcënimet në vendin e punës."

Në intervistën me Winfrey, e cila do të transmetohet të dielën në CBS, çifti pritet të diskutojë presionin që kishte Meghan përpara se të vendosnin të largoheshin nga detyrat mbretërore. Disa pjesë nga intervista janë publikuar.

"Dukesha është e trishtuar nga ky sulm i fundit ndaj karakterit të saj, veçanërisht si dikush që ka qenë objektiv i bullizmit dhe është thellësisht e përkushtuar për të mbështetur ata që kanë përjetuar dhimbje dhe trauma," u theksua në reagimin e çiftit Harry-Meghan.