Xhemi Shehu konfirmoi se nuk është më pjesë e programit të humorit, “Portokalli”, ndërkohë që Salsano Rrapi hodhi poshtë zërat e largimit. Me fjalë të tjera, “Portokalli” do të rikthehet në sezonin e ri televiziv dhe duket se Salsano nuk do të jetë vetëm në moderim.

Burime të brendshme thonë për Anabel.al se përkrah Salsanos do të jetë Eneda Tarifa, e cila ka prezantuar edhe më parë programin e humorit.

Anabel.al u përpoq të kontaktonte me Enedën për vërtetësinë e rikthimit në “Portokalli”, por nuk morëm një përgjigje.

Tarifa u largua nga “Portokalli” në vitin 2016.

“Kalova një periudhë shumë të bukur 6-vjeçare pranë një spektakli shumë të bukur, i cili më dha disa dimensione të tjera, siç ishte aktrimi dhe prezantimi. Nuk jemi të përjetshëm, të pazëvendësueshëm. Televizionet ndjekin praktikat e rotacionit, ndodh edhe me ekranet e mëdha. 6 vjet intensive në një punë të vështirë ishin shumë të lodhshme. Kam nevojë të kem një periudhë pushimi, sepse aty janë gjërat, nuk kam frikë për të ardhmen. E di që nëse do kem dëshirë për një projekt të madh, do ta bëj, sepse punoj fort.” – tha ajo e ftuar te “Rudina”.

Një vit më vonë, Eneda shpjegoi për Fjodora Fjorën në emisionin "Chic" se largimi i saj ishte pjesë e një cikli, "mund të kishte ndodhur në çdo moment", dhe s'kishte asnjë pakënaqësi me drejtuesit pasi ishte vendim i përbashkët.