Filmi i Kiara Titos dhe Luiz Ejllit, i cili u zbulua fillimisht nga vetë Kiara në maj të këtij viti, po nxjerr në dritë detaje të reja dhe duket se është drejt fazës finale të realizimit.
Së fundmi, përmes një postimi në Instagram, Luiz Ejlli ka publikuar posterin zyrtar të filmit, i cili mban titullin “Loja e Fundit”, me sloganin: “Në dashuri kush nuk luan, humbet”. Ky projekt shënon filmin e parë ku çifti aktrojnë së bashku dhe në role protagoniste.
View this post on Instagram
Skenari i filmit është shkruar nga Klaudia Brahimaj, skenariste e filmave të njohur “Luli dhe Goni Lemes”, "I Love Tropoja", "2 Gisht Mjaltë 2" si edhe projekte të tjera kinematografike shqiptare. Ndërsa regjia mban firmën e Bjordi Mezinit, i cili gjithashtu ka realizuar regjinë e të njëjtëve filma dhe serialit "H.O.T".
Luiz Ejlli, siç e dimë, nuk është i panjohur për publikun në fushën e aktrimit, pasi më herët ka qenë pjesë e filmit “Në kuadër të dashurisë” me Olta Gixharin.
Kiara megjithatë, debuton si aktore me këtë projekt. Në maj të këtij viti ajo zbuloi në "Top Albania Radio" se filmi do të ketë dhe romancë:
“Sigurisht që do të ketë edhe dashuri brenda, ku do shkojmë ne të dy pa transmetuar pak dashuri.”
Më tej, përgjatë shtatorit Luizi konfirmoi se po fillonin xhirimet e filmit dhe u shpreh se së bashku me Kiarën do t'i shohim shumë më ndryshe nga më parë në këtë projekt:
“Do të shihni një Luiz dhe një Kiara si kurrë më parë”, u shpreh ai, pa zbuluar më shumë detaje rreth subjektit.
Duke gjykuar nga detajet e deritanishme, duket se "Loja e fundit" do të jetë një film romancë-komedi, i cili do të dalë në transmetim në shkurt të vitit 2026.
