Trump shpall fazën e parë të marrëveshjes për paqe në Gaza mes Izraelit dhe Hamasit
Presidenti i SHBA-së, Donald Trump, njoftoi se Izraeli dhe Hamasi kanë rënë dakord dhe kanë "miratuar" fazën e parë të planit të tij për paqe në Gaza. Njoftimi erdhi pas përfundimit të ditës së tretë të bisedimeve të ndërmjetësuara, të zhvilluara në Egjipt.
Në një postim në rrjetin e tij social, Truth Social, Trump shkroi se të dyja palët kanë pranuar një marrëveshje të propozuar nga administrata e tij, duke e cilësuar këtë si përparimin më të madh pas muajsh në luftën shkatërruese në Gaza, e cila vetëm pak ditë më parë hyri në vitin e saj të tretë.
Faza e parë e këtij “plani paqeje me 21 pika” parashikon një ndalim të menjëhershëm të luftimeve, si dhe lirimin e të gjithë pengjeve që ndodhen ende në Gaza, në këmbim të lirimit të qindra të burgosurve palestinezë nga burgjet izraelite.
OKB-ja detyrohet të shkurtojë ndjeshëm misionet paqeruajtëse pas ndërprerjes së fondeve nga SHBA
Organizata e Kombeve të Bashkuara do të nisë shkurtime të mëdha në forcat dhe operacionet e saj paqeruajtëse, duke detyruar mijëra ushtarë të largohen nga pikat e nxehta të konflikteve nëpër botë. Shkurtimet vijnë si pasojë e reduktimit të fondeve nga SHBA, donatori më i madh i OKB-së.
Një zyrtar i lartë i OKB-së, që foli në kushte anonimiteti pas një takimi të mbyllur, informoi gazetarët të mërkurën se rreth 25% e forcave paqeruajtëse do të reduktohen në muajt e ardhshëm.
Sipas tij, kjo masë ishte e domosdoshme për shkak të politikës “Amerika e Para” të Presidentit Trump, që po reflektohet në ndryshimet e financimit ndaj organizatave ndërkombëtare.
Macron do të emërojë kryeministër të ri brenda 48 orëve
Presidenti francez Emmanuel Macron do të emërojë një kryeministër të ri brenda 48 orëve nga mbrëmja e së mërkurës, njoftoi Pallati Élysée.
Kryeministri në detyrë, Sébastien Lecornu, konfirmoi të njëjtën gjë gjatë një interviste më herët të mërkurën, duke shtuar se misioni i tij për të negociuar me partitë e tjera tashmë ka përfunduar.
Duke folur për televizionin France 2, Lecornu bëri të ditur se ishte takuar me presidentin gjatë ditës për t’i dorëzuar rezultatet e raundit të fundit të konsultimeve politike.
Eurodeputetët refuzojnë pjesërisht marrëveshjen me Mercosur
Një fitore e ngushtë, por gjithsesi fitore, për kundërshtarët e marrëveshjes tregtare të arritur me vendet e Mercosur në dhjetor 2024.
Të mërkurën, Parlamenti Europian votoi për një rezolutë që përcakton strategjinë politike të BE-së ndaj Amerikës Latine. 269 eurodeputetë votuan kundër një paragrafi që kërkonte përfundimin e marrëveshjes me Mercosur, duke sinjalizuar përplasjet që priten në të ardhmen mbi këtë marrëveshje të debatueshme.
Votimi në Strasburg u vendos vetëm me 10 vota diferencë, pasi 259 deputetë votuan pro, duke reflektuar ndarjen e thellë të Parlamentit mbi këtë çështje.
