Netanyahu kërkon falje për sulmin ajror në Doha
Kryeministri izraelit Benjamin Netanyahu i ka kërkuar ndjesë zyrtare Katarit, pasi një sulm ajror izraelit në Doha që synonte një delegacion të Hamas-it shkaktoi vrasjen e një shtetasi kataras.
“Kryeministri Netanyahu shprehu keqardhje të thellë për vrasjen e paqëllimshme të një ushtaraku kataras gjatë një sulmi me raketa kundër objektivave të Hamasit në Katar. Ai pranoi gjithashtu se Izraeli kishte shkelur sovranitetin e Katarit dhe premtoi se një gjë e tillë nuk do të ndodhë më.”
Sulmi i 9 shtatorit vrau gjithashtu të paktën pesë anëtarë të rangut të ulët të Hamasit, ndërsa objektiv kryesor ishin udhëheqës të lartë të grupit që po negocionin një armëpushim të mbështetur nga SHBA.
YouTube do të paguajë 24.5 milionë dollarë për të mbyllur padinë e Trump
YouTube ka pranuar të paguajë 24.5 milionë dollarë për të zgjidhur një padi të ngritur nga presidenti amerikan, Donald Trump në vitin 2021, pas pezullimit të llogarisë së tij. Llogaria e Trump është rikthyer në platformë që nga viti 2023.
Trump kishte paditur gjithashtu edhe rrjetet sociale X dhe Meta (Facebook), të cilat këtë vit ranë dakord të paguajnë për të zgjidhur paditë.
Shembet godina në një shkollë islame në Indonezi, 1 i vdekur, 99 të plagosur
Një shkollë në Indonezi është shembur të hënën, duke shkaktuar të paktën një viktimë, 99 të plagosur (disa në gjendje kritike) dhe duke lënë dhjetëra të tjerë nën rrënoja.
Ngjarja ndodhi në shkollën fetare Al Khoziny në qytetin Sidoarjo të Java Lindore. Ekipet e shpëtimit punuan gjithë natën për të nxjerrë të mbijetuarit nga rrënojat.
BE-ja shqyrton ndryshimin e rregullave për anëtarësimet, për të anashkaluar veton e Hungarisë
Bashkimi Europian po shqyrton ndryshime në rregullat e anëtarësimit për të kapërcyer veton e vazhdueshme të Hungarisë ndaj aplikimit të Ukrainës për në BE.
Aktualisht, çdo hap i procesit të anëtarësimit kërkon miratim unanim, çka i jep secilit vend anëtar të drejtën e vetos. Prej më shumë se një viti, Hungaria ka bllokuar hapjen e kapitullit të parë të negociatave me Ukrainën, që përfshin çështje kyçe si demokracia, të drejtat e njeriut dhe gjyqësori.
Budapesti ka përmendur si arsye të vetos luftën në Ukrainë, sigurinë energjetike, bujqësinë dhe trajtimin e minoritetit hungarez në vend. Më herët këtë vit, kryeministri Viktor Orbán nisi edhe një konsultim kombëtar për këtë çështje.
