Në fillim të këtij muaji, Netflix publikoi të dhënat e transmetimit për gjysmën e parë të vitit 2025 dhe në krye të listës së serialeve më të ndjekura ndodhet “Adolescence”, një miniserial tronditës me katër episode që bëri bujë kudo në botë.
Me një vlerësim të jashtëzakonshëm prej 98% në Rotten Tomatoes, “Adolescence” është tashmë një nga pretendentët kryesorë për çmimet televizive më të rëndësishme në muajt në vijim.
Nëse nuk e keni parë ende ose nëse doni ta përjetoni sërish, ja pse ia vlen të shikoni “Adolescence” (përsëri):
Owen Cooper mahnit në rolin e Jamie Miller
Ky është roli i parë televiziv për adoleshentin Owen Cooper, por që tani duket se ai ka një karrierë të gjatë përpara. Ai luan Jamie Miller-in, një djalë që akuzohet për vrasjen e shoqes së klasës së tij, Katie Leonard (luajtur nga Emilia Holliday).
Ajo që e bën performancën e Cooper kaq të fuqishme është aftësia për të hyrë natyrshëm në personalitetin e ndërlikuar të Jamie-t. Fillimisht ai duket si një djalë i zakonshëm, por me kalimin e episodeve, maska bie dhe shfaqet një anë e errët që të lë pa fjalë.
Në episodin e tretë, ai është njëkohësisht kërcënues dhe manipulues, ndërsa përpiqet të fitojë besimin e psikologes Briony Ariston (e interpretuar shkëlqyeshëm nga Erin Doherty, e njohur nga "The Croën").
Aktorë të jashtëzakonshëm dhe realizim teknik i rrallë
Regjisori Philip Barantini ka ndërmarrë një sfidë të rrallë: çdo episod i “Adolescence” është xhiruar në një shkrepje të vetme, pa ndërprerje, në kohë reale. Kjo është një arritje teknike që kërkon saktësi absolute nga çdo aktor dhe anëtar i ekipit.
Stephen Graham shkëlqen në rolin e Eddie Miller, babait të Jamie-t, një baba i brengosur që nuk di si të përballojë fajin e heshtur për gjithçka që ka ndodhur. Edhe ai është nominuar për një çmim Emmy, ashtu si Ashley Walters, që luan detektivin Luke Bascombe. Megjithatë, kritikët mendojnë se Cooper është ai që e meriton më shumë çmimin në këtë kategori.
Erin Doherty ka marrë gjithashtu një nominim për Aktoren Dytësore më të Mirë për rolin e saj në episodin 3, ndërsa Christine Tremarco, në rolin e nënës së Jamie-t, Manda Miller, ofron një performancë po aq të thellë dhe prekëse. Disa e shohin si konkurrenten më serioze për të fituar në këtë kategori.
“Adolescence” hap debate të rëndësishme dhe të domosdoshme
Pa zbuluar shumë nga rrëfimi, “Adolescence” eksploron rrethanat që çuan në vrasjen e Katie Leonard dhe se si Jamie përfundoi në atë pikë. Edhe pse Katie bëri disa zgjedhje të këqija, seriali është i qartë në mesazhin e tij: asgjë nuk e justifikon atë që i ndodhi asaj.
Seriali heton me ndjeshmëri mënyrën se si Jamie u radikalizua nga ndikimet toksike të të ashtuquajturës “manosferë”, pjesë e errët e rrjeteve sociale ku përhapet urrejtja ndaj grave. Kjo është një temë reale dhe aktuale, për të cilën shoqëria ende nuk ka gjetur përgjigje të qarta.
