Gjatë një interviste së fundmi në programin “MCN Urgenca”, Ana Lika u pyet për përplasjen e saj me Fifin. “Nuk pata asgjë, thjesht thashë mendimin tim asokohe,” u shpreh ajo. “Sot jam bërë keq fare, jam shëndoshur. Po të shoh intervistën që kam thënë atëherë, do them ‘po çfarë thua moj të hëngërt mortja, shiko si je bërë për vete'.”

Shumë njerëz besojnë te *Karma* – besimi shpirtëror se veprimet dhe mendimet e një individi përcaktojnë të ardhmen e tij (në shqip: “Ç’të mbjellësh, do të korrësh” ose “Bota është portokalle”) – megjithëse Ana shton se “nuk beson se e ka mallkuar Fifi”. “Kjo është Karma. Jo jo, nuk besoj se më ka mallkuar. Fifi në vetvete nuk është vajzë e keqe. Unë i dashuroj këngët e saj.”

E ftuar në emisionin “Pop Sugar” në Radio Travel në tetor të 2018-s, Ana Lika u bë pjesë e një loje. Ajo duhet të komentonte 11 VIP-a, pa i përmendur emrin. Mirëpo kur erdhi radha tek Fifi, Ana theksoi se nuk e kishte problem t'i përmendte emrin. Pasi komentoi sherrin me Tayna-n, ajo përmendi peshën e Fifit, duke përdorur përcaktorë si “fuçi uthulle” dhe “balenë”.

“Kam dëgjuar që fliste dhe për peshën. Mendoj që më mirë të mos lodhet që t’i humbë ato kile, sepse nuk do t’i humbë pasi është gjenetike. Po të dobësohet do ta humbë atë...dmth njerëzit e kanë dashur ashtu.”

Asokohe, gjatë një interviste në rubrikën “Flakë Fare” në “Pop Culture”, Fifi u shpreh: “Anës thjesht i uroj suksese në jetë edhe uroj që ajo energjia negative t’i zbutet. Më duket se ajo në të gjithë intervistat që ka bërë, ka thënë që kërkon një burrë. Ishalla e gjen o motër se ashiqare të hiqet energjia negative. Edhe qetësohu se jeta është e bukur.”

Komentet për peshën nuk ishin rasti i parë. Gjatë finales së Big Brother në qershor të 2017-s, aktorët e humorit të “Pa Limit” (E diell) vendosën në qendër banorët konkurrentë të edicionit të nëntë të reality show-t. Ana Lika imitoi Fiorentinën dhe skeçi u përqëndrua tek pesha e saj dhe dëshira për të ngrënë.

Humoristja u vendos në qendër të studios duke qarë sepse i hahej, ndërsa një zë në rolin e Big Brother në sfond i thoshte se ishte shëndoshur dhe nuk duhej të hante më. “Mos më thuaj ashtu, se më hape oreksin!”, thoshte Ana Lika në rolin e Fiorentinës. Fiorentina qeshte mirëpo, kur më pas Arbana e pyeti si iu duk skeçi i përgatitur për të, ajo u përgjigj shkurt: “Ishte shumë e dukshme”, një mënyrë për të thënë që “shaka pa kripë, ose me më shumë kripë seç duhet.”