Mirëmbrëma miq! Mirë se erdhët në puntatën e parë të ‘Klanifornia!’ emisionit më të shumëpritur të momentit. Marina vjen sërish në ekran, ‘Duplex’ u ristrukturua, Lisa Kujofsa u rikthye, Delina Disha la Top Channel, Olsi Bylyku gjeti punë pas ‘Të dielës shqiptare” dhe kaq shumë zallamahi për këtë spektakël. Rezultati është, për çudi, një imitim i bërë keq i ‘Portokallisë.’
Marina e hap siparin me një përshëndetje të thjeshtë, një hyrje të thjeshtë, fjalë të thjeshta, buzëqeshje të buta që s’thonë asgjë. Në një skenë që i ngjason kaq shumë asaj të “Portokallisë,” e vetme, Marina s’e mbart dot barrën e s’i jep dot zë heshtjes. Ngjan sikur diçka nuk shkon. Ndoshta është puntata e parë dhe s’ia ka marrë ende dorën, por ç’pamë, po shkruajmë.
Performanca hapëse ishin mariachi-t që folën në spanjisht, por nuk thanë asgjë. Ata i pasoi Jul Deda që imitoi Genc Cakajn, i cili u pasua nga Olsi Bylyku që rrëfeu peripecitë që hoqi për të gjetur skenën e spektaklit. Më pas, Lisa Kujofsa si Eni Çobani bëri një punë që mund ta quajmë të hajrit. Aty dëgjuam publikun të qeshte për herë të parë.
Minutat në vijim pasohen nga e njëjta çehre që pret të qeshë, e etur të argëtohet pak, por s’merr as humor, as argëtim mbrapsh. Kështu që e kuptojmë përdorimin e të qeshurave false në sfond në momente “kulminante.”
Është mëkat që një kastë kaq e zgjeruar aktorësh dhe talentet e tyre nuk shfrytëzohen siç meritojnë. S’jemi të vetmit që mendojmë kështu. Në seksionet e komenteve të Instagrameve të Tv Klan dhe Klanifornia, shikuesit shprehen të zhgënjyer. Madje, disa preferojnë “Duplex.” Por sa besë mund t’i zësh dikujt që pëlqen “Duplex?”
Dikush e krahasoi me “Al Pazar” që në mënyrën e vet është një version rural i “Portokallisë,” por Llakaj e gjeti audiencën e tij. A do ta gjejë “Klanifornia?”
Shtesë: Sapo ishte botuar ky artikull kur Jul Deda del në skenë si subjekti romantik i një personazhi të stereotipizuar gay. Oh Zot, fiks kur menduam se s’mund të ishte më keq se kaq.
Nga Alberta Kamenica
