Aktorja Gwyneth Paltrow është në gjyq me një optometrist në pension, i cili e akuzon atë për një aksident të rrezikshëm, që daton në vitin 2016 në Utah.
Mosmarrëveshja buron nga një aksident më shumë se shtatë vjet më parë midis Paltrow dhe Terry Sanderson, 76 vjeç, në një vendpushim skijimi. Avokatët e Sanderson argumentojnë se neglizhenca e Paltrow shkaktoi përplasjen që dëmtoi rëndë 76-vjeçarin.
"Është përgjegjësi e skiatorëve sipër që t'u japin të drejtën e kalimit njerëzve poshtë,” tha avokati. "Skiatorët poshtë tyre besojnë se ata që vijnë pas po i kushtojnë vëmendje."
Sanderson pretendon se më 26 shkurt 2016, Paltrow po kalonte nëpër shpatet e malit në mënyrë të shkujdesur saqë u përplasën, duke e lënë atë në tokë ndërsa ajo dhe shoqëruesi i saj vazhdonin zbritjen në Deer Valley Resort, një mal i njohur për pistat e tij.
Si pasojë e përplasjes, 76-vjeçari pësoi dëmtime në tru, përfundoi me katër brinjë të thyera dhe lëndime të tjera, pretendon avokati i tij. Paltrow u ngrit dhe u largua, duke e lënë Sanderson të shtangur, të shtrirë në dëborë dhe të plagosur rëndë.
Terry Sanderson e ka paditur aktoren për 300,000 dollarë dhe pretendon se aksidenti ndodhi si pasojë e neglizhencës dhe ai u plagos fizikisht dhe u shqetësua emocionalisht.
Paltrow kundërshtoi, duke kërkuar 1 milion dollarë dëmshpërblim. Ekipi i saj ligjor pretendon se 76-vjeçari po shfrytëzon famën dhe pasurinë e saj.
