Google Image

Jenna Ortega mund të jetë kthyer në një nga figurat më të dashura të Hollywood-it me rolin e saj si “Wednesday”, por me famën vjen edhe një ankth i thellë që nuk shihet nga të gjithë. Në një rrëfim së fundmi, ajo foli hapur për sfidat e të qenit një vajzë e re që rritet në qendër të vëmendjes dhe për frikën që e shoqëron.

“Gjëja më e frikshme është ideja se mund të humbas vetveten.”

Ortega shpjegoi se presioni për të qenë gjithmonë “në formë”, për të përmbushur pritshmëritë e industrisë dhe të mediave sociale, mund ta tjetërsojnë. E rrethuar nga sy që e vëzhgojnë në çdo hap, ajo pranoi se ndonjëherë druhet se autenticiteti i saj mund të zëvendësohet nga një imazh që nuk e përfaqëson.

“Hollywood-i të imponon një ide të caktuar se si duhet të jesh, si të dukesh, si të sillesh. Sfida ime më e madhe është të mos humbas veten në gjithë këtë zhurmë.”

Ajo theksoi se dëshiron të mbetet e sinqertë me veten, edhe nëse kjo do të thotë të zhgënjejë pritshmëritë e të tjerëve që duan ta shohin “të përsosur”.

Duke folur për fillimet e karrierës, Jenna rrëfeu se nuk ndihej e dëgjuar.

“Të jesh e re dhe e vendosur është diçka që shumë njerëz nuk e përtypin lehtë, sidomos kur je vajzë. E di shumë mirë si ndihesh kur nuk ke zë dhe kjo është një ndjenjë që më tmerron.”

Ajo shtoi:

“Nuk dua të kthehem më në atë situatë. Për mua është thelbësore ta përdor zërin tim në mënyrën më të mirë, me profesionalizëm dhe mirësi.”

Megjithëse frika për të humbur veten është gjithmonë aty, Jenna Ortega theksoi se është e vendosur që të mos e lërë atë frikë ta mposhtë. Ajo shtoi se dëshiron të jetë zëri i atyre që ndihen të pa dëgjuar, sidomos për vajzat që përballen me sfida të ngjashme në një botë që shpesh kërkon më shumë sesa ofron.